Aımaǵambetov aǵylshyn tílín mektepte aptasyna úsh emes, bes ret oqytudy ūsyndy, dep habarlaıdy aqshamnews.kz
Májílís deputaty, būrynǵy bílím mınıstrí Ashat Aımaǵambetov Úkímetke joldaǵan deputattyq saualynda qazírgí talaptardy qaıta qarap, ádílettí jol ūsynudy sūrady.
Qoldanystaǵy ereje boıynsha, talapkerler aǵylshyn tílínen míndettí emtıhan tapsyruy tıís. Būl talap oqytu tílí qazaq nemese orys tílínde júretín mamandyqtarǵa da bírdeı qoldanylady. Másele — tíldí bílmegení úshín qabílettí jastardyń ǵylymnan tys qaluynda.
«Qazaq ádebıetí men ónerín zerttegísí keletín jastar aǵylshyn emtıhanynan óte almaǵany úshín magıstratura men doktoranturaǵa túse almaı júr», – deıdí deputat.
Aımaǵambetov būl talapty kezínde mınıstr retínde ózí bekítkenín moıyndaıdy. Bíraq uaqyt ózgerdí. Onyń aıtuynsha, ChatGPT men Gemini sekíldí jasandy ıntellekt qūraldary aǵylshyn tílíndegí aqparatty audaruda eleulí ról atqara bastady. Sondyqtan ǵylymǵa qoljetímdílíktí aǵylshyn emtıhanymen shekteu – búgíngí kúnníń talabyna saı kelmeıdí.
Aımaǵambetovtíń ūsynystary tek syn emes, naqty reformalyq qadamdardy da qamtıdy: mektepterde aǵylshyn tílín oqytudy kúsheıtu, oqu barysynda aǵylshyn tílín tereńdetíp engízu, talaptardy salalyq saralauǵa kóshu bolyp otyr.
Bírínshíden, aǵylshyn tílín erte – mektepten bastap sapaly túrde oqytudy árí qaraı kúsheıtu qajet. Kezínde prezıdenttíń tapsyrmasyna sáıkes 3-4 synyptar men 10-11-synyptarda aǵylshyn tílí saǵatyn aptasyna 3 sabaqtan 5 sabaqqa deıín kóbeıtudí qolǵa alǵanbyz. Bíraq būl bastama tolyq íske aspady. Osy baǵytty naqty íske asyruymyz kerek. Ekínshíden, oqytu tílí qazaq nemese orys tílínde júrgízíletín baǵyttarda aǵylshyn tílínen emtıhandy túsu kezínde emes, oqu ayaqtalǵan soń tapsyrudy qarastyrǵan jón. Al sol kezeńge deıín aǵylshyn tílín bakalarvrıat, magıstratura men doktoranturanyń oqu baǵdarlamasyna kírgízíp, tereńdetíp oqytqan dūrys. Sonda naqty nátıje bolady. Úshínshíden, aǵylshyn tílínde oqytatyn nemese qosdıplomdy baǵdarlamalar, men fılıaldar úshín būl talapty kerísínshe kúsheıtken jón. Yaǵnı ár baǵytqa qaraı saralau qajet. Tórtínshíden, Scopus pen Web of Science bazalarynda maqala jarıyalau talabyn da mamandyqtyń erekshelígíne qaraı qarastyrǵan jón, – deıdí ol.