Tsıfrlyq memleket jaǵdaıynda būl másele jańa mazmūnǵa ıe boluy tıís, dep habarlaıdy aqshamnews.kz tílshísí.
«Ádílet» partıyasy fraktsıyasynyń deputattyq saualy Qazaqstan Respublıkasy Mádenıet jáne aqparat mınıstrí A.O. Qyryqbaevqa joldanady.
Qūrmettí Arman Orazbaıūly!
Prezıdent reformalary eldíń sayası, ekonomıkalyq jáne qoǵamdyq damuyna jańa múmkíndíkter ashyp, básekege qabílettí ūlt qalyptastyrudy kózdeıdí.
Alaıda jańa zańdar men jańǵyrǵan memlekettík ınstıtuttardyń ózí jetkílíksíz. Reformalardyń ornyqtylyǵy qoǵamdaǵy ortaq qūndylyqtarǵa, azamattardyń zańǵa qūrmetíne, memleketke degen senímí men jeke jauapkershílígíne baılanysty.
Osy uaqytqa deıín bíz konstıtutsıyalyq qūndylyqtardy qūqyqtyq tūrǵydan bekítuge, qorǵauǵa jáne olarǵa kepíldík beruge basymdyq berdík. Endígí míndet – sol qūndylyqtardy azamattyń sanasyna, mínez-qūlqyna jáne kúndelíktí ómíríne ornyqtyru. Óıtkení Konstıtutsıyanyń quaty onyń normalarynyń saqtaluymen ǵana emes, ondaǵy qūndylyqtardyń azamattyń íshkí ūstanymyna aınaluymen de ólshenedí.
«Ádílet» partıyasynyń saılaualdy baǵdarlamasynda aıqyndalǵan ádílet, zańǵa baǵynu, jauapkershílík, eńbekqorlyq, progress jáne patrıotızm qoǵamdyq qatynastardyń naqty qaǵıdalaryna aınaluy tıís. «Zań jáne Tártíp», «Taza Qazaqstan», «Adal azamat» bastamalaryn da bír-bírínen bólek nauqandar emes, ortaq qūndylyqtar júıesíníń qūramdas bólíkterí retínde qarastyrǵan jón.
Álemdík tájírıbe de konstıtutsıyalyq mádenıettíń tek qūqyqtyq normalar arqyly qalyptaspaıtynyn kórsetedí. Germanıyada konstıtutsıyalyq qūndylyqtardy qorǵau demokratıyalyq qūqyqtyq memlekettíń mańyzdy negízderíníń bírí retínde qalyptasqan. Sıngapur ūlttyq bíregeılík pen azamattyq jauapkershílíktí ortaq qūndylyq retínde bílím beru júıesí arqyly ornyqtyrady. Fınlyandıya azamattyq bílím, medıasauattylyq pen synı oılau arqyly ortaq qūndylyqtardyń kúndelíktí ómírde kórínís tabuyna mán beredí. Būl tájírıbelerge ortaq qaǵıda – qūndylyqtardy deklaratsıya nemese ūran deńgeıínde qaldyrmaı, memlekettík sayasat pen qoǵamdyq ómírdíń naqty mazmūnyna engízu.
Tsıfrlyq memleket jaǵdaıynda būl másele jańa mazmūnǵa ıe boluy tıís.
Osyǵan baılanysty:
1. Konstıtutsıyalyq qūndylyqtardy qoǵamda ornyqtyrudyń mazmūny men tásílderín jańartyp, olardy bílím beru, mádenıet, BAQ jáne tsıfrlyq kommunıkatsıya salalarynda íske asyrudyń naqty tetíkterín ázírleudí;
2. Konstıtutsıyalyq qūndylyqtardyń qoǵamdyq sanada qanshalyqty ornyqqanyn, azamattardyń olardy qalaı qabyldaıtynyn jáne kúndelíktí mínez-qūlqynda qalaı kórínís tabatynyn tūraqty zerdeleıtín ǵylymı-saraptamalyq júıe qalyptastyrudy;
3. Konstıtutsıyalyq qūndylyqtardy íshkí sayasattyń barlyq baǵyttaryna engízudíń bíryńǵaı tásílín ázírlep, memlekettík baǵdarlamalar men jobalardy josparlau jáne baǵalau kezínde olardyń qūndylyqtyq mazmūny men qoǵamǵa yqpalyn míndettí ólshem retínde belgíleudí ūsynamyn.
Deputattyq saualǵa zań talaptaryna sáıkes merzímde jauap joldauyńyzdy sūraımyz.
«Ádílet» partıyasy fraktsıyasynyń deputattary