Búgingi tańda álemdi ábigerge salyp jatqan «Delta» shtamy jastar úshin de tym qaýipti dep otyr mamandar. Sondyqtan JOO basshylary áriptesterin jáne stýdentterdi jappaı vaksına alýǵa shaqyrýda.
Búginde Sátbaev ýnıversıtetiniń offlaın rejıminde jumys isteıtin barlyq oqytýshysy vaksına alǵan. «Ulttyq zertteý tehnıkalyq ýnıversıteti» mártebesi berilgen jalǵyz qazaqstandyq joǵary oqý ornynda oqytýdyń eki formaty bar: onlaın jáne offlaın.
«Bul ataq tehnıkalyq ǵylym salasynda ozyq ǵylymı zertteýler júrgizýge ári ǵalymdardyń jańa býynyn qalyptastyrý úshin jaǵdaı jasaýǵa baǵyttalǵan. Bizdiń ýnıversıtet memlekettik damý baǵdarlamasyn iske asyrý maqsatynda zertteýlerdiń praktıkalyq komponentin kúsheıtýge tıis», – deıdi Satbayev University rektory Meıram Begentaev.
Ol ýnıversıtettiń damýy týraly aıta kele, KVI indetiniń bilim berý júıesine kóleńkesin túsirgenin de aıtty. «Muǵalim bilimniń negizgi kózi bolýdan qala jazdady. Biz sóıleýden buryn smartfondy ıgeretin jańa býynnyń paıda bolǵanyna kýámiz. Stýdentter áleýmettik jeliden izdegen kez kelgen oqý materıalyn taba alady. Al adamı kapıtaldy damytý úshin oqý prosesinde stýdent pen oqytýshy baılanysy mańyzdy bolmaq. Sondyqtan bilim sapasyn arttyrý úshin stýdentter partaǵa oralýy kerek. Al ol úshin vaksına alý qajet», – deıdi rektor.