Búgín Abaı unıversıtetí Almatynyń írgesínde Agrobıostantsıya keshenín resmı túrde íske qosty. Ashyluyna unıversıtet basshylyǵy, professorlyq-oqytushylar qūramy jáne studentter qatysyp, zamanauı agrobıostantsıyanyń lentasy saltanatty túrde qıyldy. Būl jaratylystanu jáne geografıya fakultetíníń bílím alushylaryna zertteu jūmystarymen aınalysyp, tájírıbe jasauǵa jasalǵan úlken múmkíndík.
Studenterdíń teorıyalyq bílímín tájírıbemen ūshtastyruǵa, ǵylymı zertteu jūmystaryn júrgízuge arnalǵan Agrobıostantsıya Almaty oblysy Eńbekshíqazaq audany Jańashar auylynda ornalasqan. 38 gektardan astam aumaqty qamtıtyn keshen studentterge oqu-tájírıbelík sabaqtaryn ótkízuge, ǵylymı jobalardy júzege asyruǵa jáne jańa agrotehnologıyalardy synaqtan ótkízuge múmkíndík beredí. Zamanauı oqu-zerthanalyq bazada zerthanalar, 60 adamǵa arnalǵan jataqhana, ashana, juynatyn bólmeler, sport alańdary men kólík tūraǵy qarastyrylǵan.
«Búgín – unıversıtetímíz úshín mańyzdy tarıhı kún. Sebebí, bílím ordamyz taǵy da bír jańa nysanmen tolyqty. Būl – unıversıtetímízdíń zertteu joǵary oqu ornyna jasalǵan úlken qadam. Agrobıostantsıya – teorıya men tájírıbeníń sıntezí. Sondyqtan, mūndaı nysannyń ashyluy unıversıtetímízdegí ǵylymnyń damuyna septígín tıgízedí. Bolashaqta būl jerde tájírıbelík jūmystar, ǵylymı zertteu jūmystary qyzu júredí dep senemín», – dedí Abaı atyndaǵy QazŪPU Basqarma tóraǵasy-Rektory Bolat Tílep.
Jaratylystanu jáne geografıya fakultetínde oqıtyn studentter agrobıostantsıyada tájírıbelík sabaqtarmen aınalysyp, magıstranttar men doktoranttar ǵylymı zertteulerín júrgízedí. Jobalar topyraq pen su resurstaryn tıímdí paıdalanu, auyl sharuashylyǵy daqyldaryn zertteu, bıologıya, ekologıya, geografıya sekíldí oqu baǵdarlamalary boıynsha jańa tehnologıyalardy synau t.b. baǵyttar boıynsha ótkízíledí.
«Búgín Jaratylystanu jáne geografıya fakultetí úshín eń quanyshty kún. Bílím alushylar úshín teorıya men tájírıbení úılestíríp, bílímín tereńdetíp, ǵylymǵa qyzuǵyshylyǵyn arttyratyn baza paıda boldy. Infraqūrylymdyq úlken bazada studentter men jetekshílerdíń ǵylymmen aınalysuyna qolaıly jaǵdaı jasalǵan. Agrobıostantsıyanyń jūmysyn jandandyryp, ǵylymı-ádístemelík ortalyqqa aınaldyru bízdíń ūjym men studentterdíń qolynda dep oılaımyn», – dedí Jaratylystanu jáne geografıya fakultetíníń dekany Kúlásh Kaımuldınova.
Keshen tabıǵı-geografıyalyq tūrǵydan qolaıly aımaqta ornalasqan. Gıdrogeologıyalyq zertteuler nátıjesínde su ūńǵymalary qazylyp, egístík alqaptaryn suaruǵa múmkíndík jasalǵan. Abaı unıversıtetíníń Agrobıostantsıyasy oqu-tájírıbe bazasy retínde qyzmet etedí jáne studentterdíń kásíbı daıyndyǵyn qoldauǵa baǵyttalǵan.
Sonymen qatar, tūsaukeser rásímínde «Taza Qazaqstan» aktsıyasynyń ayasynda kógaldandyru men ekologıyalyq tabıǵı resurstardy baıytu maqsatynda «Íle Alatau» ūlttyq parkí 100 túp aǵash kóshetín syıǵa tartty. Agrobıostantsıyanyń ashyluynda unıversıtet basshylyǵy men oqytushy-professorlar jáne studentter aumaqqa jas ósíkderdí otyrǵyzyp, keshen múmkíndígímen jan-jaqty tanysty.
Abaı atyndaǵy QazŪPU
Baspasóz qyzmetí
