Abaı oblysynyń Chekoman auylynda 12 qańtarda kúndíz joǵalyp ketken 8 jastaǵy bala aman-esen tabyldy, dep habarlaıdy Aqshamnews.kz tílshísí.
Balany ízdeuge auyl tūrǵyndary, polıtsıya qyzmetkerlerí jáne jergílíktí atqarushy organ ókílderí jūmyldyrylǵan. Ízdeu barysynda beınebaqylau kameralary sheshushí ról atqardy: uchaskelík ınspektor auyl ákímímen bírge jazbalardy qarap, balanyń qozǵalys baǵytyn anyqtap, onyń júrgen jerín tabuǵa kómektesken.
Polıtsıya málímetínshe, bala bírneshe saǵat boıy qūdyqtyń íshínde bolǵan. Ol beton plıtanyń astyndaǵy opyrylǵan tesíkten abaısyzda qūlap ketken. Balany qūdyqtan dení sau kúıínde shyǵaryp alǵan, medıtsınalyq kómek qajet bolmaǵan.
Balanyń anasy ízdeu jūmysyna qatysqandardyń barlyǵyna jedel kómekterí úshín alǵys bíldírdí. Polıtsıya beınebaqylau júıesí mūndaı jaǵdaıda baǵytty tez anyqtauǵa múmkíndík beríp, balanyń ómírín saqtap qaluǵa yqpal etkenín atap óttí.