2026 jyldyń basynan berí Almaty qalalyq Balalarǵa shūǵyl medıtsınalyq kómek kórsetu ortalyǵynda kóz aurularymen auyratyn 700-den astam nauqas em aldy, onyń íshínde 181 balaǵa hırurgıyalyq ota jasalǵan. Būl turaly qalalyq Qoǵamdyq densaulyq saqtau basqarmasynyń ókílderí aıtty, – dep habarlaıdy aqshamnews.kz tílshísí.
Ota zamanauı qūral-jabdyqtardyń kómegímen júrgízílíp, orta eseppen 25-35 mınutqa sozylady. Josparly otalar túske deıín jasalady, būl balalardyń psıhologıyalyq jaı-kúıíne túsetín júktemení azaıtuǵa múmkíndík beredí.
Negízgí baǵyttardyń bírí — balalardaǵy qylılyqty emdeu. Būl auru erte kezeńde anyqtalyp, keshendí túrde emdeludí qajet etedí.
«Qazírgí uaqytta bíz balalardyń qylılyǵyn hırurgıyalyq túrde emdep jatyrmyz. Ota erte jasta jasalady, sebebí būl eń jaqsy funktsıonaldyq nátıjege qol jetkízuge múmkíndík beredí. Balalarǵa jasalatyn ota tek syrtqy aqaudy túzetumen shektelmeı, kóru qabíletíníń, ásírese bınokulyarlyq kórudíń dūrys qalyptasuyna baǵyttalady. Sondyqtan der kezínde dıagnostıka jasap, emdí keshíktírmeı bastau asa mańyzdy», — dedí Almaty qalalyq Balalarǵa shūǵyl medıtsınalyq kómek kórsetu ortalyǵynyń oftalmohırurgí, medıtsına ǵylymdarynyń kandıdaty Lázzat Keıkına.
Dárígerlerdíń aıtuynsha, ota — emdeu úderísíníń bír kezeńí ǵana. Odan keıín nauqastar apparattyq emdeu men kórudí túzetu arqyly ońaltu kursynan ótedí.
«Būl rette, bíz jınaqtalatyn qylılyq turaly aıtyp otyrmyz: aldymen anatomıyalyq negíz qalyptastyrylady, sodan keıín kózíldírík jáne arnaıy apparattar arqyly em jalǵasady», — dedí oftalmohırurg.
Ortalyqta qylılyqtan bólek, katarakta, glaukoma jáne kózdíń qosymsha apparatyna qatysty túrlí patologıyalar boıynsha da operatsıyalar jasalady.
Em Qazaqstannyń barlyq óńírínen kelgen balalarǵa qoljetímdí. Emdeu barysynda zamanauı tehnologıya, sonyń íshínde glaukomany emdeude arnaıy drenajdyq júıeler qoldanylady.
Jańa korpustyń ashyluy ortalyqtyń múmkíndígín edáuír arttyrdy: bólímshe 40 orynǵa arnalǵan jáne zamanauı operatsıyalyq jabdyqtarmen tolyq qamtamasyz etílgen.
Sonymen qatar, shala tuǵan nárestelerdegí torqabyq aurularyn emdeuge baǵyttalǵan vıtreoretınaldyq hırurgıya da qarqyndy damyp keledí.
«Bízdíń míndet — balalar oftalmologıyasynda emdeu men hırurgıyanyń barlyq zamanauı ádísterín tolyq meńgeru. Barlyq ota MÁMS ayasynda tegín júrgízíledí. Almaty qalalyq Balalarǵa shūǵyl medıtsınalyq kómek kórsetu ortalyǵynyń oftalmologıya bólímíne elímízdíń túkpír-túkpírínen kelgen balalar mūnda josparly túrde em qabyldaı alady», — dedí bólímshe meńgerushísí Nūrtas Keńesov.