Qurlyq áskerleri Prezıdent Jarlyǵymen 1993 jyly burynǵy Orta Azıa áskerı okrýginiń 40-shy jalpy áskerı armıasy negizinde quryldy.
Qurlyq áskerleriniń búgingi áleýeti elimizdiń aýmaqtyq tutastyǵy men egemendigin qorǵaý, memlekettik jáne áskerı nysandardy kúzetý, zańsyz qarýly toptarmen kúres, sondaı-aq elimiz ratıfıkasıalaǵan halyqaralyq sharttarǵa sáıkes tapsyrmalardy oryndaýǵa tolyq qabiletti.
Búginde Qurlyq áskerleriniń quramyna «Astana», «Shyǵys», «Batys», «Ońtústik» óńirlik qolbasshylyqtary, tyldyq jáne tehnıkalyq qamtamasyz etý quramalary men bólimderi, Qurlyq áskerleriniń áskerı ınstıtýty, Shoqan Ýálıhanov atyndaǵy Qorǵanys mınıstrliginiń áskerı koleji kiredi, dep habarlaıdy aqshamnews.kz Qorǵanys mınıstrliginiń málimetine silteme jasap.
Qurlyq áskerleri qolbasshylyǵynyń negizgi kúsh-jigeri turaqty jaýyngerlik daıyndyqty saqtaýǵa, áskerı basqarý organdary men áskerlerdi jaýyngerlik maqsatqa sáıkes mindetterdi sheshýge daıyndaýǵa baǵyttalǵan.
2024 jyly áskerlerdi daıarlaý barysynda 40 000-nan astam is-sharalar júzege asyryldy. Onyń ishinde 2000-nan astam áskerı mindettiler oqytylyp, 70-ten astam jumyldyrý oqý-jattyǵýlary men jattyǵýlar ótkizildi.
Jyl saıyn Qurlyq áskerleriniń bólimderi men bólimsheleri halyqaralyq jáne óńirlik jattyǵýlarǵa qatysady. Shtabtyq, komandalyq-shtabtyq oqý-jattyǵýlar, áskerı oıyndar, jıyndar men kýrstyq daıyndyq qazirgi zamanǵy qarýly qaqtyǵystardy taldaýdy eskere otyryp júrgiziledi.
Tájirıbe almasý jáne áskerlerdiń ekijaqty formattaǵy úılesimdiligin arttyrý maqsatynda Úndistan Qarýly kúshteri bólimshelerimen «KazInd», Qyrǵyz Respýblıkasymen «Dala suńqary», Ózbekstan Respýblıkasymen «Hamqorlyq» birlesken oqý-jattyǵýlary ótti. Ońtústik» óńirlik qolbasshylyǵynyń áskerı qyzmetshileri Pákistan Islam Respýblıkasynda ótken halyqaralyq jarystyń jeńimpazy atanyp, jaýyngerlik daıyndyqtyń joǵary deńgeıin kórsetti.
Qurlyq áskerleri áskerı tehnıkanyń jańa úlgilerimen, joǵary dáldiktegi qarý-jaraqpen, zamanaýı baılanys quraldarymen, barlaý jáne avtomattandyrylǵan basqarý júıelerimen qamtylǵan. Joǵary mobıldi, tehnıkalyq jabdyqtalǵan jáne jaýyngerlik qabiletti Qurlyq áskerleri egemendikti, eldiń aýmaqtyq tutastyǵyn jáne azamattardyń beıbit ómirin qorǵaýǵa daıyn.