2026 jylǵa arnalǵan eń tómengi jalaqy mólsheri burynǵy deńgeıde bekitilgendikten, negizgi sanattar boıynsha MÁMS-ke tólenetin jarnalardyń mólsheri saqtalady. Alaıda zańǵa engizilgen túzetýlerge baılanysty ózgerister bar. Bul týraly Áleýmettik medısınalyq saqtandyrý qorynda túsindirdi.
Jarna ósimi – tek memlekettik tólemderge qatysty
2025 jylǵy shilde aıynda Memleket basshysy MÁMS jáne medısınalyq qyzmetter kórsetý suraqtary boıynsha ózgerister men tolyqtyrýlar engizý týraly zańǵa qol qoıdy. Onyń bir bóligi densaýlyq saqtaý júıesiniń qarjylyq turaqtylyǵyn qamtamasyz etýge baǵyttalǵan – memleket, jumys berýshiler jáne azamattardyń ortaq ynymaqtastyq jaýapkershiligin arttyrý arqyly.
Osy maqsatta áleýmettik osal sanattaǵy halyq úshin (olardyń sany 11 mıllıonnan asady) memleket tóleıtin jarnalardy kezeń-kezeńimen arttyrý kózdelgen: 2027 jyly – 2,2%-dan bastap, 2037 jylǵa qaraı – 4,7%-ǵa deıin. Qazirgi ýaqytta memleket jarnalarynyń mólsherlemesi esepteý obektisiniń 2%-yn quraıdy jáne bul mólsherleme 2026 jyly da saqtalady.
Aıta keterligi, bul ózgeris jeńildik sanatyndaǵy azamattardyń ózderine esh áser etpeıdi. Olar burynǵydaı avtomatty túrde saqtandyrylǵan bolyp qala beredi, sebebi jarnalardy memleket tóleıdi.
Joǵarǵy shektiń ózgerýi neni bildiredi?
Densaýlyq saqtaý júıesiniń turaqtylyǵyn qamtamasyz etý maqsatynda 2026 jylǵy 1 qańtardan bastap qyzmetkerlerdiń jarnalary men jumys berýshilerdiń aýdarymdaryn esepteý úshin qoldanylatyn tabystyń joǵarǵy shegin arttyrý engizildi. Al paıyzdyq mólsherlemeler ózgerissiz qalady.
Qazir aýdarymdardyń eń joǵary mólsheri 25 500 teńgeni quraıdy (10 eń tómengi jalaqy mólsherindegi shekti tabystyń 3%). 2025 jyly jarnanyń eń joǵary mólsheri – 17 000 teńge (10 ETJ-nyń 2%-y).
Endi jumys berýshiler jarnalardy 40 ETJ-dan aspaıtyn tabystan, al qyzmetkerler 20 ETJ-ǵa deıingi tabystan tóleıtin bolady (bastapqyda eki tólem boıynsha da shekti 50 AEK-ke deıin arttyrý usynylǵan, alaıda zań jobasyn talqylaý barysynda olar tómendetildi).
Demek, buǵan deıin aılyq tabysy 850 myń teńgeden asatyn qyzmetkerler (1–2 mln teńge jáne odan joǵary tabys alatyndar) 17 000 teńgeden artyq jarna tólemeıtin. Sebebi esepteý bazasyna shekteý qoldanylatyn. Bul belgilengen mólsherlemege proporsıonaldy túrde az bolyp, aılyǵy 850 myń teńgeden tómen jáne jalaqysynyń dál 2%-yn tóleıtin qyzmetkerlerge qatysty ádiletsiz edi.
Ózgeristerden keıin qyzmetkerdiń eń joǵary jarnasy – 34 000 teńge (1,7 mln teńgeniń, ıaǵnı 20 ETJ-nyń 2%-y), jumys berýshiniń eń joǵary aýdarymy – 102 000 teńge (3,4 mln teńgeniń, ıaǵnı 40 ETJ-nyń 3%-y) bolady.
Aıta keteıik, bul ózgeris aı saıynǵy tabysy 850 myń teńgeden asatyn jaldamaly qyzmetkerlerdiń nebári 9%-yna ǵana áser etedi. Al aılyǵy 3,4 mln teńgeden asatyn qyzmetkerler sany – bar bolǵany 20 myń adam (0,3%). Qalǵan 91% jumys isteıtin azamattar úshin eshteńe ózgermeıdi.
Qalǵan tóleýshiler úshin jarna mólsherlemeleri
Biryńǵaı tólem tóleýshiler
Biryńǵaı tólemdi jeke kásipkerler men zańdy tulǵalar óz qyzmetkerleri úshin tóleıdi. Ol jeke tabys salyǵyn, jumys berýshi men qyzmetkerdiń mindetti zeınetaqy jarnalaryn, áleýmettik aýdarymdardy, sondaı-aq MÁMS boıynsha jarnalar men aýdarymdardy qamtıdy.
2026 jylǵy 1 qańtardan bastap biryńǵaı tólem mólsheri eseptelgen tabystyń 24,8%-yn quraıdy.
Jeke kásipkerler, sharýa qojalyqtarynyń ıeleri jáne jeke praktıkamen aınalysatyn tulǵalar
Bul sanattar MÁMS-ke 1,4 ETJ-nyń 5%-y mólsherinde jarna tóleıdi.
2026 jyly eń tómengi jalaqy mólsheri ózgermegendikten, MÁMS jarnasy da burynǵydaı – aıyna 5 950 teńge bolyp qalady. Bul tabys deńgeıine qaramastan tólenetin turaqty jarna.
Aıta keteıik, eger jeke kásipker bir mezgilde basqa uıymnyń jaldamaly qyzmetkeri bolyp, ol úshin MÁMS tólemderi aýdarylyp tursa da, jeke kásipker retinde ózi úshin jarna tóleýden bosatylmaıdy. Tek qyzmetin resmı túrde toqtatqan nemese áreketsiz dep tanylǵan jeke kásipkerler ǵana jarna tóleýdi toqtatady.
Derbes tóleýshiler
Derbes tóleýshiler sanatyna turaqty jumysy joq jáne jeńildik sanattaryna kirmeıtin azamattar jatady.
2026 jyly olar úshin MÁMS boıynsha aı saıynǵy jarna mólsheri 1 ETJ-nyń 5%-y, ıaǵnı 4 250 teńge.
Saqtandyrylǵan mártebesin alý úshin olardyń ótken nemese aldaǵy 12 aı qatarynan tólemderi bolýy tıis. Jarnalardy ár aıǵa jeke-jeke tóleý qajet.