Keshe, 16 qazanda, "Han-Táńiri" komandasynyń 19 jastaǵy shabýylshysy Dıas Tóleý mach ústinde kóz jumdy, dep habarlaıdy Aqshamnews.kz tilshisi. Jas fýtbolshynyń qazasyna qatysty qandaı derekter belgili?
Qaıǵyly jaǵdaıdyń mán-jaıy
Oqıǵa Birinshi lıgadaǵy «Han-Táńiri» – «Ekibastuz» machynyń 64-mınýtynda boldy. Dıastyń densaýlyǵy kenet nasharlap, ony alańnan zembilmen alyp shyqty. Kóp uzamaı oıynshynyń qaıtys bolǵany resmı túrde jarıalandy. Qaıǵyly jaǵdaıdyń naqty sebebi ázirge resmı atalǵan joq.
QFF-nyń áreketi
Qazaqstan fýtbol federasıasy jaqyn ýaqytta quzyrly organdarmen birlesken arnaıy komısıa qurylyp, oqıǵa jan-jaqty tergeletinin málimdedi. QFF basshylyǵy da jaǵdaıdy anyqtaý úshin Almatyǵa ushyp ketti:
"Bas hatshy Davıd Lorıa jáne kásibı klýbtar arasyndaǵy jarystar dıreksıasynyń basshysy Baqytjan Pazylhaır barlyq mán-jaıdy anyqtaý úshin shuǵyl túrde Almatyǵa ushyp barady", - delingen federasıa habarlamasynda.
Dıas Tóleý - jas talant
QFF málimetinshe, Dıas jastyǵyna qaramastan fýtbolǵa degen qushtarlyǵymen jáne darynymen kózge túsken. Ol «Qaırat» akademıasynyń túlegi, 2006 jyly 4 mamyrda týǵan. 2024 jylǵy sáýirde «Han-Táńirine» aýysty. Bıylǵy maýsymda Birinshi lıgada 18 machqa qatysyp, gol men nátıjeli paspen erekshelenbegen. Jasóspirimder quramynda «Qaırat» sapynda shamamen 15 mach ótkizip, 3 gol soǵyp, 2 goldyq pas bergen.
Klýbtyń málimdemesi
"Qaırat" fýtbol klýby qaıǵyly jaǵdaıǵa qatysty jazba jarıalady.
"Búgin 19 jasynda «Han-Táńiri» oıynshysy, «Qaırat» FK Akademıasynyń túlegi Dıas Tóleý ómirden ótti. Dıas 2016–2023 jyldary bizdiń Akademıada tárbıelenip, alǵashqy QJ League maýsymynda «Qaırat» U-18 komandasynyń sapynda chempıon atanǵan. Ol meıirimdiligimen, eńbekqorlyǵymen jáne maqsatkerligimen erekshelenip, bapkerleri men komandalastarynyń qurmetine ıe boldy. «Qaırat» fýtbol klýby Dıastyń týǵan-týystary men jaqyndaryna shyn júrekten kóńil aıtady. Qaıǵylaryńyzǵa ortaqpyz", - delingen klýbtyń habarlamasynda.