Áıgerím Orazbek - Almaty qalasynyń tumasy. Búgínde ol Túrkıyanyń Antalıya qalasynda qonaqúı salasynda qyzmet etíp júr. 29 jastaǵy polıglot qazaq tílímen qosqanda 15 tíldí erkín meńgergen. Jelíde onyń bír uaqytta bírneshe tílde erkín sóılegen vıdeosy taralyp, kópshílík nazaryn ózíne audardy. Aqshamnews.kz tílshísí Áıgerímmen tíldesíp, kóp tíl úırenudíń syry men qazírgí ómírí turaly sūrap bíldí.
Kıno salasynan turızmge deıíngí jol
Áıgerím Temírbek Júrgenov atyndaǵy Qazaq ūlttyq óner akademıyasynyń "Kıno jáne TV" fakultetín támamdaǵan. Studenttík jyldary onyń oqu toby "kóptíldí" bolǵandyqtan, sabaqtardyń basym bólígí aǵylshyn tílínde ótetín. Tíl úırenuge mūnyń da kóp septígí tıgen syńaıly. Mamandyǵy - kıno salasyna qatysty bolǵasyn, ózín būl qyrynan da azdy- kóptí synap kórgení bar eken.
“Jedel járdem”, “Ayauly úmít”, “Sezím” sekíldí serıaldarǵa epızod rólderge tústím. Bíraq negízínen kadr syrtynda stsenarıst-redaktor bolyp jūmys ístedím", - deıdí ol.
Qazír Aıgerím qazaq, orys, aǵylshyn, túrík, qyrǵyz, ózbek, polyak, ıtalıya, kárís, nemís, ázerbaıjan tílderín erkín meńgergen. Dat, ukraın, taı jáne japon tílderín de jetík meńgergen, degenmen álí de tájírıbe júzínde damytu qajet deıdí ózí.
Polıglottyń aıtuynsha, ol barlyq tíldí óz betínshe úırengen:
"Bala kúnímde ınternet joq, íshím pysady. Sol sebeptí kítap, sózdík oqyp kettím. Orysshany 5-6 jasymda úırendím. 9 jasymda túrík serıaldaryn kóremín dep túríkshe meńgeríp kettím. Áıteuír osylaı júríp úırene bastadym".
Kóp tíl bílu turızmge jol ashqan
Búgínde Áıgerím Antalyadaǵy bes jūldyzdy qonaqúılerdíń bírínde resepshn qyzmetín atqarady. Qajet bolǵanda audarmashylyq míndetín de óz moınyna alady.
Suret: keıípkerdíń jeke mūraǵatynan
Sondyqtan áríptesterí ony "qūtqarushy" dep atap ketken. Óıtkení ár elden kelgen qonaqpen sóılesuge kelgende Aıgerímníń tíl bílmeı qalǵan kezí sırek.
Jelíde tanymal etken vıdeo qalaı paıda boldy?
"Men jūmys jasaıtyn kompanıya qyzmetkerlerden vıdeoesep talap etedí. Sol vıdeolardy Instagram-paraqshasynda jarıyalap otyrady. Men de jūmys ústínde bírneshe rolık túsírgenmín. Bír kúní polyak jáne aǵylshyn qonaqtar qatar keldí, bírneshe tílde sóılestím. Áríptesterím jaqsy shyqty degesín, TikTok-qa sala saldym. Tańerteń tūrsam 100 myńnan astam qaralym jınap úlgeríptí. Keıín ony Instagram-ǵa basqalar kóshíríp salyp, osylaı tarap kettí", - deıdí Áıgerím.
Áıgerím turızm salasynda tabysty eńbek etíp júrgenímen, negízgí mamandyǵy boıynsha da ózín synap kórgísí keletínín jasyrmaıdy. Marvel jáne Netflix sekíldí írí kınokompanıyalardyń baıqaularyna qatysyp kórgenín aıtady.
"Ázírge naqty sheshím joq. Bolashaqta qaı joldy tańdarym uaqytqa baılanysty. Turızmde de úlken josparlarym bar – salany tereńírek zerttep, tájírıbemdí arttyrǵym keledí", – deıdí ol.
Teńíz jaǵasyndaǵy ómír - bala kúngí arman
"Jūmys jaıly, jalaqysy jaqsy boldy. Eń bastysy – teńíz jaǵasynda tūru bala kúngí armanym edí", - deıdí Áıgerím.
Kóptegen tíl bílgeníne qaramastan, ol būl qabíletín eshqashan jarıya qylyp, maqtan tūtpaıdy. Jelíge taralǵan vıdeo da jaı jūmys barysyndaǵy kadrlar ǵana eken.