«Ұстаздық – тек мамандық емес, ол –адам жанының инженері болу, жас шыбықты мәуелі бәйтерекке айналдыру» деген тәмсіл бар. Осынау қасиетті де жауапты миссияны зор абыроймен атқарып, шәкірт жүрегінен жол тауып жүрген білікті маман –Алматы облысы, Қарасай ауданы, Елтай ауылдық округіне қарасты Көкөзек жайлы мектебінің мақтанышы Сарыбаева Индира Махмұдқызы.
Қазан айының басында атап өтілетін айтулы мереке – Ұстаздар күні қарсаңында, өз баламның сынып жетекшісі, жүрегі мейірімге толы осынау ардақты жан туралы ерекше ілтипатпен тілге тиек еткім келеді.
Индира Махмұдқызының бала оқыту мен тәрбиелеудегі өзіндік қолтаңбасы бүгінде көпке үлгі. Әсіресе, оның бастауыш сынып оқушыларымен жұмыс істеудегі ерекше әдістемесі, тәртіп пен тәрбиеге деген талапшылдығы бізді, ата-аналарды, әрдайым тәнті етеді. Ол әр сабақты қызықты әрі мазмұнды өткізе отырып, баланың білімге деген құштарлығын оята білді.
Ол – шәкірттерін тек біліммен сусындатып қана қоймай, олардың жан-жақты тұлға болып қалыптасуына баса назар аударатын нағыз тәлімгер. Өзі жетекшілік ететін 4-сынып оқушылары бүгінге дейін түрлі зияткерлік олимпиадаларда, білім сайыстары мен спорттық жарыстарда әрдайым алдыңғы шептен көрініп келеді. Сыныптың әрбір баласының бойындағы талантты уақытылы байқап, оны шыңдай білу – Индира Махмұдқызының кәсіби шеберлігінің айқын дәлелі. Баламның мектепке үлкен қуанышпен барып, білім мен спортқа бірдей құштар болып өсуі тікелей осы ұстаздың қажырлы еңбегінің жемісі.
Ұстаздың ең басты қасиеті бала психологиясын терең түсініп, олардың тілін таба білуінде. Соның арқасында оқушылар ұстаздарын құрметтеп қана қоймай, оны шын жүректен жақсы көреді. Екінші бір қыры — ата-аналармен тығыз және жылы қарым-қатынас орната білуі. Баланы тәрбиелеуде мектеп пен отбасы арасындағы алтын көпір бола білген ұстаз әрқашан біздің пікірімізді тыңдап, ортақ тіл табысады. Осындай сыйластықтың арқасында сыныбымызда өте жайлы, берекелі атмосфера қалыптасқан.
«Ұстазы жақсының – ұстанымы жақсы» дейді дана халқымыз. Тәртіп пен тәрбиені, терең білімді қатар ұштастыра білген Индира Махмұдқызы – бүгінгі күннің нағыз заманауи, мықты маманы. Қажырлы еңбегіңіз үшін Сізге мың алғыс, ұстаз!
Еңлік АҚЖІГІТ, ата-ана