«Тұран» университетінің ректоры Рахман Алшанов Өңірлік коммуникациялар қызметіне Қазақстанның жаңартылған конституциясының күшіне енуіне байланысты пікір білдірді, – деп хабарлайды aqshamnews.kz тілшісі.
Сарапшының айтуынша, жаңартылған конституцияның қабылдануы мемлекеттің дамуындағы заңды кезең болды. Жүргізілген реформаның ауқымы мен маңыздылығы жекелеген түзету енгізуді емес, елдің саяси және қоғамдық өміріндегі негізгі өзгерісті бекіткен жаңа негізгі заңды қабылдауды талап етті.
«Әр мемлекет өзінің тарихи дамуындағы маңызды кезеңді конституциясында бекітеді. Сондықтан жаңа негізгі заңды қабылдау уақыт талабынан туындаған қажетті қадам болды. Ол азаматтардың құқығы мен міндетін айқындап қана қоймай, еліміздің алдағы даму бағытын да белгілейді», – деді.
Ректор жаңа қоғамдық институт – Құрылтайдың құрылуына ерекше тоқталды. Оның пікірінше, бұл бастама қоғамдық диалогтың замандық тетіктерін дамытып, мемлекет пен қоғам арасындағы өзара ықпалдастықты нығайтуға деген ұмтылысты көрсетеді екен.
Саяси жүйенің дамуына тоқталған Рахман Алшанов еліміздің партиялық құрылыстың жаңа кезеңіне қадам басқанын айтты. Оның сөзінше, бүгінгі таңда саяси үдерістер қарқынды дамып келеді, сондықтан жауапты, ықпалды саяси партияларға деген сұраныс арта түскен.
«Көппартиялық жүйе еліміздің белгілі бір даму кезеңінде маңызды рөл атқарды. Қазір саяси күштердің топтасып, қуатты партия құрып, мемлекет игілігі үшін нақты ұсыныс жасап, тиімді жұмыс істейтін сындарлы оппозицияның қалыптасар уақыты келді», – деп атап өтті сарапшы.
Ректордың пікірінше, алдағы уақытта саяси партиялар идеялар бәсекесіне, жауапкершілік пен қоғаммен тиімді өзара іс-қимылға негізделген кемел саяси жүйені қалыптастыру үшін күш-жігерін біріктіруі қажет.
Сөз соңында Рахман Алшанов жаңартылған Конституция елді одан әрі жаңғыртуға, мемлекеттік институттарды нығайтып, Қазақстанның саяси жүйесінің тиімділігін арттыруға берік құқықтық негіз қалайтынын атап өтті.