Жамбыл облысында өзін қоғамдық белсенді ретінде таныстырған азаматтың ірі көлемде ақша бопсалады деген күдікке ілінгені белгілі болды, – деп хабарлайды aqshamnews.kz тілшісі.
Облыстық Полиция департаментінің мәліметінше, Тараз қаласының тұрғыны құқық қорғау органдарына өзіне бопсалау жасалғаны жөнінде арызданған.
Аталған дерекке байланысты полиция сотқа дейінгі тергеп-тексеруді бастаған. Жедел іс-шаралар барысында күдікті арызданушыға қысым көрсетуді тоқтату және бұған дейін әлеуметтік желілерде жарияланған жағымсыз пікірлерді өшіру үшін ақша алу сәтінде ұсталған.
Алдын ала мәлімет бойынша, ол жәбірленушіден 5 миллион теңге талап еткен.
Полиция департаменті мұндай жағдайға тап болған азаматтарды бірден полицияға хабарласуға шақырды.