Астанадағы Перизат Қайраттың ісіне қатысты сотта көктемгі су тасқыны кезінде қайырымдылық көмекке қатысты эпизод бойынша куәгерлер мен жәбірленушілерден жауап алу жалғасып жатыр, - деп хабарлайды Аqshamnews.kz.
2024 жылғы сәуірде зейнеткер Амина Аймағамбетова банк қосымшасы арқылы Перизат Қайрат басқаратын "BizBirgemiz Qazaqstan 2030" қоғамдық ұйымына 1 миллион теңге аударған.
"Жарнама өте көп болды. Бірақ неге екені белгісіз, дәл сол BizBirgemiz атауы бізге сенімді көрінді. Ақша діттеген жеріне жетеді деп ойладық, сондықтан аудардым. Зейнеткерлер үшін бұл аз ақша емес", - деді әйел.
Оның айтуынша, ол Перизат Қайратпен де, оның анасымен де бұрын-соңды таныс болмаған.
Перизат Қайрат ісі
Перизат Қайрат - Қазақстанда белгілі қоғам қайраткері әрі кәсіпкер. Ол 2021 жылғы маусымда құрылған қайырымдылық қорының негізін қалаушы әрі басшысы болған.
2024 жылғы қарашада Перизат Қайрат 1,5 миллиард теңгеден астам қаражатты жымқырды деген күдікпен қамауға алынған. Тергеу деректеріне сүйенсек, бұл қаражаттың бір бөлігі жылжымайтын мүлік, қымбат көліктер мен шетелдік сапарларға жеке қажеттілік үшін жұмсалған.
Сондай-ақ, Перизат Қайрат қор қаржысын қолма-қол ақшаға айналдыру үшін достары мен туыстарын тартты деген де болжам бар. Олар көрсеткен "қызметі" үшін сыйақы алып отырған көрінеді.