Қазақстанда стоматологиялық қызметтерге зейнетақы жинағы арқылы төлеу үшін өтінім қабылдау тоқтатылады. Шектеу 15 қыркүйектен бастап күшіне енеді, - деп хабарлайды Аqshamnews.kz.
"15 қыркүйекен бастап enpf-otbasy.kz платформасында тіс емдеуге зейнетақы жинағынан артылған қаражатты пайдалану туралы өтінім қабылданбайды. Бұл күнге дейін берілген өтініштер әдеттегі тәртіппен қаралады", – делінген "Отбасы банкінің" хабарламасында.
Банк мәліметінше, зейнетақы жинағын стоматологиялық қызметтерге пайдалану жөніндегі өтінімдерді қабылдау қашан қайта басталатыны туралы ақпарат қосымша жарияланады.
Еске салайық, бұған дейін Қаржы мониторингі агенттігінің төрағасы Жанат Элиманов Президент Қасым-Жомарт Тоқаевқа зейнетақы жинақтарын заңсыз қолма-қол ақшаға айналдыру деректері туралы баяндаған еді. ҚМА стоматологиялық қызметтер желеуімен 200 миллиард теңгенің негізсіз ЕНПФ-тен алынғанын анықтады. Қаражат жалған схемалар арқылы шығарылған, оған жеке клиникалар тартылған.