Жеке тұлғалар сатып алған телефондарын 25 маусымға дейін тіркеп үлгеруі керек, деп хабарлайды aqshamnews.kz
«Жаңа енгізілген ережелерге сәйкес верификациядан өтпеген ұялы телефон сұр тізімге енеді. Тұлға 30 күннің ішінде мобильді құрылғыны ақ тізімге өткізуі тиіс. Егер жеке тұлға смартфонды шетелден алса, верификациядан өткізу мақсатында ол құжаттарды көрсетіп әрекетін растауы керек», - деді Телекоммуникациялар комитетінің төрағасы Дамир Сейсембеков.
Айта кетейік, елімізде сатылып жатқан ұялы телефондардың 75 пайызы заңсыз жолмен әкелінеді. Салдарынан ел бюджеті жылда 70-80 млрд теңгеден қағылады. Тек, 2024 жылы 5 млн құрылғы көлеңкелі жолмен сатылып, қазына қаржысы 150 млрд теңге салықтық төлемдерден айырылған.
Кәсіпкерлер мен жеке тұлғалар ұялы телефонды kz-imei.кz порталында тіркей алады. Талапты орындамағандар жауапкершілікке тартылуы мүмкін.