Әлемдік бокс ұйымы (WBO) орта салмақтағы әлем чемпионы, қазақстандық Жәнібек Әлімханұлын негізгі белбеулердің иегері америкалық Теренс Кроуфордтың ықтимал қарсыластарының қатарына қосты, - деп хабарлайды Аqshamnews.kz тілшісі Sports.kz-ке сілтеме жасап.
WBO-ның ресми әлеуметтік желілерінде Кроуфордтың мүмкін қарсыластары туралы жазба жарияланды. Тізімге Әлімханұлымен бірге ресейлік Дмитрий Бивол және ұлыбританиялық Хамза Шираз енді.
"Жәнібек? Бивол? Шираз? Үш есім. Үш сын. Теренс "Бад" Кроуфордтың келесі жекпе-жегіне үш ықтимал жол?" — делінген жазбада.
Еске салайық, өткен аптада Теренс Кроуфорд Сауль "Канело" Альваресті төрешілердің бірауыздан шығарған шешімімен жеңіп, екінші орта салмақта жаңа абсолют чемпион атанды.