Кардиология және ішкі аурулар ғылыми-зерттеу институтында 77, 76, 71 жастағы үш пациентке соңғы буынғы қолқа клапаны имплантацияланды. Қолқа стенозы – егде жастағы адамдарда жиі кездесетін жүрек ақауы, өте қауіпті дерт, себебі кенеттен өлімге әкелуі мүмкін, деп хабарлайды aqshamnews.kz
71 жастағы науқас әйел ұзақ уақыт бойы – 7 жылдан бері гемодиализде жүр. Ол қолқа қақпақшасының стенозы, митральды қақпақшаның жеткіліксіздігі, жүректің ишемиялық ауруы, асқынулардың даму қаупі өте жоғары артериялық гипертензияның 3-сатысы, созылмалы жүрек жеткіліксіздігіне шалдыққан және 2024 жылдың желтоқсанында инфарктқа ұшыраған. Оған биылғы қаңтарда стент қойылды, бірақ денсаулығы жақсармады, ентігуі басылмады. Оның жағдайын жеңілдету үшін дәрігерлер тәуекелге барып, оған ота жасау қажет деп шешті. Операция сәтті өтті.
Соңғы буынғы қолқа клапанын клиниканың интервенциялық кардиологтары Санкт-Петербург қаласы В.Алмазов атындағы ҰМЗО рентгенхирургиялық диагностика мен емдеудің әдістері бөлімшесінің меңгерушісі Дмитрий Зубаревпен бірге имплантациялады.
«Бұл ота қолқа стенозы бар науқастарды емдеудегі маңызды қадам болды және олардың өмір сүру сапасын жақсартуға жаңа мүмкіндіктер ашты. Соңғы буынғы қолқа клапанын имплантациялау - маңызды жетістіктеріміздің бірі. Денсаулығы мен өмірін бізге сеніп тапсырған пациенттерге жақсы күтім мен емдеуді қамтамасыз ету үшін кардиологияға инновациялық технологияларды үздіксіз енгізудеміз», – дейді Басқарма төрағасы Марат Пашимов.
Заманауи транскатетерлі қолқа клапаны қолқа стенозын емдеуге арналған. Ол орналасу дәлдігімен ерекшеленеді, бұл коронарлық артерияларға кедергісіз қол жеткізуге мүмкіндік береді.