«Өрлеу» БАҰО» АҚФ Алматы қаласы бойынша ПҚБАИ ұжымы Қазақстан Президенті Қасым-Жомарт Тоқаевтың Қазақстан халқына арнаған «Халық бірлігі және жүйелі реформалар – ел өркендеуінің берік негізі» атты Жолдауымен толық танысып, маңызды мәселелер төңірегінде өз ойларын ортаға салды.
Кафедраның аға оқытушысы Гүлбала Кеніштайқызы Жолдаудағы «Пандемиядан кейінгі кезеңдегі экономикалық даму», «Денсаулық сақтау жүйесінің тиімділігін арттыру», «Сапалы білім беру», «Өңірлік саясатты жетілдіру», «Еңбек нарығында тиімді экожүйе қалыптастыру», «Саяси жүйе және адам құқығын қорғау», «Ұлттың ұйысуы – одан әрі дамудың басты факторы» атты жеті басымдыққа жеке-жеке шолу жасады. Академиялық бөлімнің бас маманы Назерке Қарабалаева «Сапалы білім беру» бағытындағы көтерілген маңызды мәселелерге тоқталды.
Мемлекет басшысының мұғалімдердің біліктілігін арттыруды 3 жылда бір рет қайта даярлықтан өткізуге назар аударғаны институт қызметі үшін маңызды шара болмақ деп отыр мамандар. Бұл мәселені осыған дейін республиканың бас ұстазы Асхат Аймағамбетов те қозғаған болатын. «Өрлеу» БАҰО тарапынан өткізіліп жатқан курстық іс-шараларда мұғалімдердің пәндік білімін көбейтуге, пән мазмұнын дұрыс түсінуіне, білім алушылардың оқу әрекетін дұрыс жоспарлауға, бағалауға, сабақ беру, оқушыларды оқуда қолдау сияқты шеберліктерін шыңдауға басымдық беріліп келеді. Кафедрадағы тренерлер осы бағытта курстарды сапалы ұйымдастырып, жүйелі түрде өткізіп жүр. Курстық іс-шараларға мұғалімдер тарапынан да жауапкершілік артқанын айта керу керек.
«Ұлттың ұйысуы – одан әрі дамудың басты факторы» басымдығында көтерілген мемлекеттік тіл туралы мәселе тақырыбында «Курстан кейінгі қолдау және әдістемелік сүйемелдеу зертханасының» меңгерушісі Перуза Асылбек өз пікірін мемлекеттік саясатпен, қоғамдық жағдаймен байланыстыра отырып, тілдің иесі – халқымыздың өзін жаппай мемлекеттік тілдің мәртебесін көтеруге жұмылдырудың аса маңызды екендігін атап өтті.
Сөз кезегінде оқу және мониторинг бөлімінің бас маманы Гүлмира Темірханова «Су тапшылығы» тақырыбы бойынша әріптестерді су көздерін үнеммен пайдалануға, ғаламшардағы адамзатқа берілген мүмкіндіктерді бағалауға шақырды.