Қазақстандық спортшылар 3 алтын, 1 қола жүлдемен үшінші орынға көтерілді
Қазақстандық биатлоншы Бекентай Тұрлыбеков АҚШ-тың Лэйк-Плэсид қаласында өтіп жатқан Қысқы Универсиадада 10 шақырымға спринт жарысында чемпион атанды, деп хабарлайды Almaty-akshamy.kz ҚазАқпаратқа сілтеме жасап.
Жарыс барысында ол екі атыс сызығында бірде-бір оқты бос жіберген жоқ. Нәтиже көрсеткен уақыты- 27:51,5. Осылайша қазақстандық биатлоншы ел құрамасына үшінші алтынды салды.
Аталған жарыста екінші орын Бьорн Уэстервелтке бұйырса, үздік үштікті қазақстандық тағы бір биатлоншы Александр Мухин еншіледі.
Нәтижесінде аталған сайыста ел құрамасы бір алтын, бір қола медаль алды.
Еске салсақ, бұған дейін биатлоншы Вадим Куралес пен шаңғымен секіру спортынан Данил Васильев чемпион атанды.
Осылайша медальдар кестесінде қазақстандық спортшылар 3 алтын, 1 қола жүлдемен үшінші орынға көтерілді. Алда Жапония және Финляндия құрамалары келеді.