Таңсауле Серіков елімізде мүгедектігі бар азаматтардың құқықтарын қорғау мен олардың өмір сапасын жақсарту мақсатында «Ұлттық мүгедектер палатасын» құруды ұсынды. Оның айтуынша, бұл бастама әр саладағы инклюзивті бағдарламаларды бір жүйеге келтіруге мүмкіндік беріп, қаржылық қолдаудың ашық әрі әділ бөлінуін қамтамасыз етеді.
"Қазіргі таңда мүгедектігі бар азаматтарға арналған түрлі ұйымдар мен қоғамдар жан-жаққа шашырап кеткен. Егер олар бір орталықтан басқарылса, нақты мұқтаж жандарға көмек көрсету тиімділігі артар еді. Осы бағыттағы жүйелі шешімдерді қарастыру – Президентіміздің әлеуметтік саясатын қолдаудың бір көрінісі деп білемін," – деді ол.
Бұл ұсыныс әлеуметтік қолдаудың жаңа деңгейге көтерілуіне, мүмкіндігі шектеулі азаматтардың құқықтары мен мүдделерін қорғаудағы нақты қадам болмақ.