Бүгін Қазақстанда Үкіметтің кеңейтілген отырысы өтті. Отырысты ашқан Мемлекет басшысы Қасым-Жомарт Тоқаев үкімет пен әкімдердің жұмысының тиімділігі экономиканың даму көрсеткіштері мен халықтың тұрмыс сапасына байланысты екенін атап өтті, деп хабарлайды aqshamnews.kz
Президент:
– «Үкімет пен әкімдердің жұмысы қаншалықты тиімді екенін алдымен экономиканың даму көрсеткіштері мен азаматтардың тұрмыс сапасына қарай бағалаймыз. Осы жұмыстың нәтижесі былтыр қандай болды? Негізгі міндеттер орындалды ма? Бүгін осы сұрақтарға тоқталамыз және жақын арада шешімін табуға тиіс өзекті мәселелерді талқылаймыз», – деді.
Күн тәртібіне сәйкес, жиында елдің әлеуметтік-экономикалық дамуы мен өзекті мәселелер бойынша бірқатар баяндамалар тыңдалды. Баяндамашылар қатарында:
Премьер-Министр Олжас Бектенов,
Премьер-Министрдің орынбасары Серік Жұманғарин,
Ұлттық банк төрағасы Тимур Сүлейменов,
«Самұрық-Қазына» АҚ басқарма төрағасы Нұрлан Жақыпов,
Астана қаласының әкімі Жеңіс Қасымбек,
Шымкент қаласының әкімі Ғабит Сыздықбеков,
Қызылорда облысының әкімі Нұрлыбек Нәлібаев болды.
Отырыста 2023 жылдың негізгі әлеуметтік-экономикалық көрсеткіштері қорытындыланып, елдің дамуындағы маңызды мәселелер мен оларды шешу жолдары талқылануда. Сонымен қатар, Президент алдағы уақытқа арналған басты міндеттер мен басымдықтарды айқындауға ерекше көңіл бөлді.