Үкімет Каспий мәселесін зерттеуге қосымша 305 миллион теңге бөлді, деп хабарлайды aqshamnews.kz
«Қазақ Каспий теңізі ғылыми-зерттеу институты» КеАҚ-қа Үкімет резервінен 305 млн теңге бөлінді. Премьер-министр Олжас Бектенов тиісті қаулыға қол қойды», – делінген үкімет таратқан ақпаратта.
2025 жылы Қазақстанда Каспий теңізі жөніндегі ғылыми-зерттеу институты жұмысын бастаған. Олар теңіздің тартылу себептерін зерттеп, экожүйе жағдайын бақылап, су қоймасын қалпына келтіру жолын іздейді. Ұйымды қаржыландыруға бұған дейін 846 миллион теңге бөлінетіні хабарланған.
• 518 млн теңге – жабдық сатып алуға (жергілікті бюджеттен),
• 328 млн теңге – штат пен инфрақұрылымды ұстауға (республикалық бюджеттен).
2024 жылы Каспийдің Қазақстан жақ бөлігіндегі су деңгейі 26 см-ге төмендеп, Балтық жүйесі бойынша -29,12 метрге жетті. 2050 жылға қарай тағы 3–5 метрге түсуі мүмкін.