Қазақстанда Бірыңғай ұлттық тестілеудің жаңа халықаралық форматы пайда болуы мүмкін.
Бұл туралы Ғылым және жоғары білім министрі Саясат Нұрбек A мәлімдеді, - деп хабарлайды aqshamnews.kz.
Министрдің айтуынша, жаңа тест қазақстандық түлектерге әлемнің кез келген жоғары оқу орнына, сондай-ақ шетелдік университеттердің Қазақстандағы филиалдарына түсуге мүмкіндік береді. Жоба әзірге дайындық кезеңінде, ал оны толық енгізу 2027 жылдан ерте басталмайды.
Саясат Нұрбек қазіргі ҰБТ-ның кейбір халықаралық университеттер тарапынан сенімсіздікпен қабылданатынын атап өтті. Сондықтан жаһандық стандарттарға сай, әлемдік университеттер мойындайтын тест қажет.
«Бұл жаңа тест жоғары оқу орнына түсу үшін әмбебап, халықаралық деңгейде мойындалатын форматта болуы тиіс. Оны әзірлеуге кемінде тағы бір жыл қажет. 2027 жылдан бастап іске асады деп жоспарлап отырмыз», – деді министр.
Жаңа форматты жасауға Қазақстан мамандары Educational Testing Service (ETS) ұйымында оқудан өтеді. Бұл — SAT, TOEFL секілді халықаралық тесттердің авторы.
Ал дәстүрлі ҰБТ қажеттілік жойылғанға дейін өткізіле береді. Министрдің айтуынша, болашақта талапкерлер халықаралық тестті жаппай қолдана бастаса, ҰБТ-ға деген сұраныс біртіндеп азаюы мүмкін.