Алматы қаласында орналасқан №11 мекемеде «Республика күні – ұлттық мереке» және «Қазақстан – туған өлкем» деген тақырыптармен танымдық, патриоттық іс-шара өтті.
Оған Жамбыл атындағы қалалық жасөспірімдер кітапханасының іс-шараларды ұйымдастыру бөлімінің басшысы Р.Қозбекова және кітапханашылар қатысты.
Іс-шарада түзеу мекемесінде жазасын өтеп жатқан жасөспірімдер республика тақырыбын бейнелейтін суреттер салды. Сол суреттеріне түсініктеме беріп, мән-мағынасын баяндап берді. Сонымен қатар, патриоттық өлеңдерді мәнерлеп оқыды. Елдік тақырыптағы әндерді шырқады. Кітапханашылар дайындаған кітап көрмесін тамашалады.
Іс-шара соңында жеңімпаз жасөпірімдерді Жамбыл атындағы қалалық жасөспірімдер кітапханасының қызметкерлері жақсы өнер көрсеткендері үшін марапаттап, кітаптар сыйға тарту етті.
– Жалпы, түзеу мекемесіндегі бас бостандығынан айырылған өрендер біз жүрген сыртқы әлемге шықпайды, шығарылмайды. Сондықтан болар, басқа алаңдайтын, елітетін ештеңе жоқ, сабақтарына барады, кітапханаға кіреді, көркем шығармалар оқиды, осындай танымдық, көпшілік іс-шараларға белсене қатысады. Осы орайда Жамбыл атындағы қалалық жасөспірімдер кітапханасының қызметкерлеріне алғыс айтқым келеді, – дейді №11 мекемесінің САӘПТЖБ бастығы, әділет подполковнигі Алма Бәзілбаева.