Депутат Дәулет Тұрлыхановтың екінші ұлы да бір әйелді таяқтап тастапты. Әлеуметтік желілерде видеосы жарияланған, деп хабарлайды Almaty-akshamy.kz.
Соңғы кездері халық қалаулысының ұлдары әкесін жерге қаратып жатыр. Дегенмен, халық қалаулысы ұлдарының әрекетіне түсінік беруден шаршамайтын секілді. Екінші ұлының шалт әрекетін айтып, халық қалаулысы өзінің әлеуметтік желісінде ақталыпты.
«Құрметті қауым!
Бүгінгі әлеуметтік желілерде менің ұлыма қатысты тараған видео бойынша түсінік беруді жөн көрдім.
Өздеріңіз білетіндей, менің әулетім айналасындағы мұндай оқиғалар бірінші рет емес. Осындай оқиғалардың заңдылықпен қайталануы менің көңіліме еріксіз ой салады. Мен өз тарапымнан балаларыма толықтай әкелік, қазақы тәрбие бердім. Бүгінгі видеоға қатысты менің де қоятын бір сұрағым бар. Таңғы сағат 4-те мұндай азаматшалар ұлым тұратын үйге келіп, неге ондай оқиғаға бастау болатыны түсініксіз. Және бұл жағдай аяқ астынан камераларға түсіп қалып, белгілі бір адамдарға пайдалы қиындыларының ақпарат құралдарына тарауы, менің ғана емес, кез келген адамның көңіліне күмән келтіреді.Бұл менің отбасыма соңғы жылдары жасалған кезекті ақпараттық шабуыл деп ойлаймын. Видеоны аңғарған адамға менің баламның бұл жанжалдан барынша қашқақтауға әрекет жасағаны анық көрінеді. Сіздерге түсінікті болу үшін видеоның толық нұсқасын жолдап отырмын. Осы болған жағдайды дұрыс түсінулеріңізді сұраймын», - деді халық қалаулысы.
Айта кетсек, бұған дейін Мәжіліс депутатының үлкен ұлы махаббаты үшін әскерден қашып кеткені туралы жазған едік. Сол кезде де халық қалаулысы баласының әрекетіне түсінік беріп, елдің алдында ақталған болатын.
