Аудандық ветеринария мамандары мен ауыл тұрғыны ақпараттық жүйеде шын мәнінде жоқ шамамен 100 мың бас ұсақ малды тіркеп, 271 млн теңге субсидияны жымқырған, - деп хабарлайды Аqshamnews.kz/kz тілшісі. Бұл туралы Бас прокуратураның баспасөз қызметі хабарлады.
Қадағалау органының мәліметінше, ветеринарлық қызметтің төрт қызметкері жергілікті тұрғынмен сөз байласып, бірнеше шаруа қожалығының атына жалған мал енгізген. Соның нәтижесінде олар бюджеттен жүздеген миллион теңгені заңсыз шығарып, қаражатты өзара бөліскен.
Түркістан қалалық соты бес адамды алаяқтық пен құжаттарды қолдан жасау бойынша кінәлі деп таныды. Төртеуіне 5,2 жылға бас бостандығынан айыру жазасы тағайындалды. Тағы біреуіне бостандықты шектеу жазасы берілгенімен, кейін оған қатысты іс рақымшылық актісіне байланысты тоқтатылды.
Мемлекет пайдасына 50 млн теңге өндіріліп, құны 120 млн теңгеге бағаланатын мүлікке тыйым салынды. Прокуратура субсидия қаржысын жымқыру үшін 10 жылға дейін бас бостандығынан айыру жазасы қарастырылғанын еске салды.
