Түркістан облысында дәрігерлер 1 жасар баланың қолын білегіне дейін кесіп алып тастауға мәжбүр болды. Абайсызда оң қолын еттартқышқа салып алған бала есінен танып қалған. Дәрігерлер баланың қазіргі жағдайы орташа, бірқалыпты ауыр дейді, - деп хабарлайды Аqshamnews.kz тілшісі Otyrar.kz-ке сілтеме жасап.
Түркістан облысы Төле би ауданы Көксәйек ауылында бір жасар ойын баласының оң қолы еттартқышқа түсіп, шайнап кеткен. Дәрігерлер оның бір өлімнен аман қалғанын айтады. Оқиға 7 қыркүйекте болған. Ес-түссіз, көп қан жоғалтқан баланы облыстық балалар ауруханасына түске жақын жедел жәрдеммен ата-анасы жеткізген.
"Үйінде ата-анасы банкі жауып жатқан кезде бала қолын еттартқышқа тығып алып, шайнап кеткен. Толық көлемде. Күндізгі кезекшілікте алып келді. Біз жедел түрде жансақтау бөліміне жатқызып, ол жерде жедел түрде ота жасап, балаға көмек көрсеттік. Қолын төменгі білек дейді, сол жерге дейін шайнап кеткен. Саусақтары мен алақан сүйектерінің барлығын майдалап шайнап тастаған. Қолын сақтап қалуға мүмкіндік болмады. Қолы жаңағы еттартқышта майдалап, термен ғана ілініп тұрды", - дейді дәрігер-травматолог Ержан Шәріпов.
Дәрігерлердің айтуынша, бала жансақтау бөлімінен шығарылғанымен жағдайы қалыпты орташа ауыр. Ота кезінде баланың оң қолын білегіне дейін кесіп алып тастауға мәжбүр болған. Дәрігерлерге төтеншеліктер көмектескен. Әуелі мамандар баланың қолын еттартқыштан шығарып алған.
"Төтенше жағдайлар департаменті қызметкерлері облыстық балалар клиникалық ауруханасында баланың қолын еттартқыштан босату бойынша бірегей операция жүргізді. 112 нөміріне бір жарым жасар баланың қолын электр еттартқышқа сұғып алғаны туралы хабарлама келіп түскен. Дәрігерлер баланы өз күштерімен босата алмаған соң, құтқарушылардың көмегіне жүгінуге мәжбүр болды. Операция дәрігерлермен бірлесіп жүргізілді. Балаға наркоз берілгеннен кейін құтқарушылар апаттық-құтқару құралын пайдаланып, еттартқыштың корпусын мұқият кесіп, оның қолын босатты", - деді Шымкент қалалық төтенше жағдайлар департаментінің баспасөз қызметі өкілдері.
Қазір бала есін біледі, сөйлей алады. Оған ата-анасы қарап жатыр. Баласының жағдайынан есеңгіреп қалған ата-ана оқиға туралы қандай да бір пікір беруден бас тартты. Құтқарушылар мен дәрігерлер ата-аналарға барынша мұқият әрі сақ болуға, баланы жалғыз қараусыз қалдырмауға шақырады.