Шолпан-Атада (Қырғызстан) Түркі мемлекеттері ұйымына мүше мемлекеттердің Ішкі істер министрлерінің бірінші кеңесі өтті.
Іс-шараға Әзербайжан, Қазақстан, Қырғызстан, Түркия және Өзбекстан Ішкі істер министрліктерінің өкілдері қатысты. Қазақстандық делегацияны Ішкі істер министрі Ержан Саденов басқарды, деп хабарлайды aqshamnews.kz Ішкі істер министрлігіне сілтеме жасап.
Жиын алдында Қырғыз Республикасының Президенті Садыр Жапаров делегация басшыларымен кездесіп, қазіргі заманғы сын-қатерлерге тиімді қарсы тұру үшін құқық қорғау органдарының ынтымақтастығын нығайтудың маңызын атап өтті.
Отырыста ұйымға мүше мемлекеттердің Ішкі істер министрліктерінің бірлескен жұмысының негізгі мәселелері талқыланды. Қылмыскерлерді іздеу, экстремизмге, есірткі қылмысына, заңсыз көші-қон мен киберқылмысқа қарсы күрес сияқты негізгі бағыттар бойынша ынтымақтастықтың тиімділігін арттыруға ерекше назар аударылды.
Жиын соңында бірлескен Декларацияға қол қойылды.
Кездесуде сындарлы диалог құрылып, маңызды шешімдер қабылданды.
Сондай-ақ іс-шара аясында Қазақстан Ішкі істер министрінің Әзербайжан және Түркия Республикасы ІІМ басшыларымен екіжақты кездесулері өтті, онда ведомствоаралық өзара іс-қимылдың перспективалары айқындалды.
