Бүгінгі таңдау – еліміздің ертеңгі дамуы мен болашағына бағытталған маңызды қадам, деп хабарлайды aqshamnews.kz тілшісі.
Алматыда Қазақстанның халық артисі, актер, режиссер, театр педагогы, профессор Тұңғышбай Жаманқұлов Қазақстан Республикасы Құрылтайы депутаттарының сайлауына қатысып, дауыс берді.
Өнер майталманы ел өміріндегі маңызды саяси науқанға қатысу әр азаматтың жауапкершілігі деп атап өтті. Оның айтуынша, бүгінгі таңдау – еліміздің ертеңгі дамуы мен болашағына бағытталған маңызды қадам.
«Бүгін Қазақстанның азаматы ретінде сайлауға қатысып, дауыс бердім. Еліміздің болашағы, ертеңі жарқын болсын деген ниетпен, Жаңа Қазақстанның өркендеуіне үлес қосатын, халықтың үмітін ақтайтын азаматтарға үлкен сенім артамын. Алдағы Құрылтайда елдің болашағын ойлайтын, халықтың мұң-мұқтажын жеткізетін депутаттар сайланады деп сенемін. Сондықтан азаматтық таңдау жасап, дауыс бердім», – деді Тұңғышбай Жаманқұлов.