2024 жылдың 11 қазанында Әбілхан Қастеев атындағы Қазақстан Республикасының Мемлекеттік өнер музейінде Темірбек Жүргенов атындағы Қазақ ұлттық өнер академиясы ұйымдастырған «Тұлғалар ізімен» көрмесінің салтанатты ашылуы өтті. Бұл іс-шара Республика күніне орайластырылып, Алматы қаласының мәдени өміріндегі маңызды оқиғалардың біріне айналды, деп хабарлайды aqshamnews.kz.
Көрмені Темірбек Жүргенов атындағы Қазақ ұлттық өнер академиясының ректоры Арман Жүдебаев құттықтау сөз сөйлеп ашып, студенттер мен қаланың мәдени өмірі үшін іс-шараның маңыздылығын атап өтті. Көрмені тамашалаған сарапшылар ұсынылған жұмыстардың деңгейін жоғары бағалап, жас таланттардың ұлттық дәстүр аясында дамуының маңыздылығын ерекше атап өтті.
Экспозицияда Академияның кескіндеме, мүсін және дизайн факультетінің 50-ден астам жұмысы ұсынылды. Көрмеге келушілер бейнелеу өнерінің түрлі жанрларын тамашалады: монументалды және станокты графика, кескіндеме, баспа графикасы, мүсін өнері, сондай-ақ гобелен, батик, ши және зергерлік өнерді қоса алғанда, сәндік-қолданбалы өнердің әртүрлі түрлері. Бұл көрменің бірегейлігі – Академия студенттерінің жұмыстары алғаш рет Қастеев музейі сияқты ауқымды алаңда ұсынылды.
Көрмеде қазақ мифологиясына, халық ертегілері мен аңыздарына арналған туындылар ерекше орын алды. Мысалы, А. Омарқұлдың «Бабалар сөзі» және С. Мұхтарқызының «Жезтырнақ» атты жұмыстары көрермендерді ежелгі бейнелер әлеміне жетелеп, оларды заманауи көзқарас тұрғысынан қайта ой елегінен өткізді. Суретшілер халық ауыз әдебиеті арқылы берілетін мәдени мұраны мұқият қалпына келтірді.
«Тұлғалар ізімен» көрмесі жас суретшілердің шеберлігін ғана емес, олардың ұлттық дәстүрі мен тарихының терең байланысын көрсетті. Темірбек Жүргенов атындағы Қазақ ұлттық өнер академиясының кескіндеме факультеті көптеген авторлардың шығармашылығы шыққан орта, Қ. Телжанов, М. Кенбаев, Х. Наурызбаев сияқты қазақ өнерінің көрнекті қайраткерлерінен бастау алады. Олар кескіндеме, мүсін және станокты графиканың ұлттық мектебінің негізін қалады.
Жүргенов атындағы Қазақ ұлттық өнер академия Орталық Азиядағы өнердің әртүрлі саласында мамандар даярлайтын жетекші оқу орындарының бірі болып табылады, ал өткен көрме оның жоғары мәртебесі мен Қазақстан мәдениетінің дамуына қосқан үлесін растады.
Көрме 2024 жылдың 11 қазанынан 30 қазанына дейін Ә. Қастеев атындағы музейде келушілерге ашық болды.