Қыс мезгілінде көктайғақ салдарынан тайып құлап, жарақат алатындар көбейеді. Сондықтан қарапайым сақтық ережелерін сақтау – өз қауіпсіздігіңізді қорғаудың ең тиімді жолы. №7 қалалық ауруханасының травматолог дәрігері Жасұлан Арғынбаев көктайғақ кезінде назар аударатын негізгі кеңестерді бөлісті, - деп хабарлайды aqshamnews.kz тілшісі.
№7 қалалық ауруханасының травматолог дәрігері Жасұлан Арғынбаев
Дұрыс аяқкиім – қауіпсіздіктің басты шарты
Маман ең алдымен ыңғайлы, табаны таймайтын аяқ киім таңдауды ұсынады. Табаны кедір-бұдыр, жұмсақ резеңкелі аяқ киім сырғанау қаупін азайтады.
Қалай жүру керек?
Көктайғақта жүру техникасы да маңызды:
- Асықпай жүріңіз;
- Табанды толық басыңыз, аяқтың ұшымен жүруден сақтаныңыз;
- Екі қолды бос ұстаңыз (қолды қалтаға салмаңыз);
- Денеңізді сәл алға еңкейтіп жүріңіз – тепе-теңдік сақтауға көмектеседі.
Тайып құлап бара жатсаңыз не істеген дұрыс?
Дәрігердің айтуынша, құлап бара жатқанда жарақатты жеңілдетудің де тәсілі бар.
"Тайып құлаған жағдайда жарақат ауыр болмауы үшін бір жақ жаныңызбен құлауға тырысыңыз. Ең бастысы – сабыр сақтап, бірден атып тұрып кетпеу керек", – дейді травматолог Жасұлан Арғынбаев.
Құлағаннан кейін:
- алдымен қол-аяқ буындарыңызды қимылдатып, қатты ауырсыну жоқ-жоғын тексеріңіз
- бәрі дұрыс екеніне көз жеткізгеннен кейін ғана жайлап тұрыңыз;
- сыну белгілері (қатты ауырсыну, ісіну, қозғалтқанда күшею, аяқ-қолдың қалыптан тыс қисайуы) байқалса, дереу 103 нөміріне хабарласыңыз.