Бүгін қалалық субұрқақтарға арналған пресс-тур өтті. Қаладағы тарихи маңызға ие субұрқақтарға жасалған пресс-турды Алматы қаласы Қоғамдық кеңістіктерді дамыту басқармасының ұйымдастырған болатын.
Онда БАҚ өкілдері алғаш рет жер астындағы техникалық бөлмелерді аралап, ескі инфрақұрылыммен және жоспарланған жөндеу жобаларымен танысты.
Коммуналдық меншіктегі төрт ірі субұрқақ – Шығыс және Батыс субұрқақтары, Республика алаңындағы басты субұрқақ және Ғ.Мүсірепов атындағы балалар мен жасөспірімдер театры алдындағы субұрқақ та биыл алғаш рет кешенді реконструкциядан өтеді.
Қалалық Қоғамдық кеңістіктерді дамыту басқармасы басшысының орынбасары Батырхан Сүлейменовтің айтуынша, жобаның бастапқы құны 8 млрд теңгені құраса, кейіннен Алматы қаласының әкімі Ерболат Досаевтың тапсырмасымен шығындар оңтайландырылып, сома 6 млрд теңгеге дейін қысқартылған. Мемлекеттік сатып алу нәтижесі бойынша келісімшарт 5,130 млрд теңгеге жасалып, үнем 3 млрд теңгені құрады.
– Құрылыс шығындарының 65-70 пайызы құрылыс-монтаж жұмыстары мен заманауи еуропалық жабдықтарға жұмсалады. Субұрқақтар үшін испандық Fluidra компаниясының, сондай-ақ Германия мен Италияда өндірілген сапалы құрылғылар қолданылады. Жабдыққа 5 жылдық кепілдік пен 3 жыл техникалық қызмет көрсету қарастырылған, ал қызмет ету мерзімі – 15 жыл», — деді Батырхан Айбатұлы.
Жөндеу жұмыстары барысында гидрооқшаулауды жаңарту, инженерлік желілерді ауыстыру, автоматтандырылған басқару жүйесін енгізу, жарықтандыру, сорғы және сүзу жүйелерін толықтай жаңғырту жоспарланған. Субұрқақтардағы су тазарту процесі хлордың орнына белсенді оттегі генераторы арқылы жүргізілетін болады.
Субұрқақтардың тарихи және сәулеттік ерекшеліктерін сақтау жобаның басты басымдығы. Гранит плиталары мен табиғи тастар бұрынғы қалпында қалдырылып, эстетикалық бейнесі сақталады.
Техникалық қызмет көрсетуді жүзеге асыратын «Эко Алматы» ЖШС директорының орынбасары Рүстем Мұхаметжанов қазіргі таңда қалалық 66 субұрқаққа қызмет көрсетілетінін атап өтті.
«Біз субұрқақтардың санитарлық жағдайын, техникалық жүйелерін, су тазалау және консервациялау жұмыстарын жүргіземіз. Қазіргі таңда 45 қызметкер, соның ішінде 8 электрик, 7 сантехник пен дәнекерлеуші жұмыс істейді. Жөндеу аяқталғаннан кейін де біз қызмет көрсетуді жалғастырамыз», — деді ол.
Жоба инженерлік инфрақұрылымды жаңартып қана қоймай, тарихи келбетті сақтауға да басымдық береді. Жаңарту жұмыстары сәуір айында басталып, қазан айында – Алматы күніне дейін аяқталады деп жоспарлануда. Осылайша жаңартылған субұрқақтар Алматы тұрғындары мен қонақтары үшін заманауи демалыс орнына айналады.
«Ақшамның» анықтамасы:
Қайта жаңғыртылып жатқан субұрқақтардың барлығы да Алматы қаласының маңызды сәулеттік нысандарының құрамдас бөлігі болып табылады. Шығыс және Батыс субұрқақтары мен Республика алаңындағы субұрқақтар 1979 жылы, ал Ғ.Мүсірепов атындағы театр алдындағы субұрқақ 1962 жылы салынған. Бұған дейін оларға тек косметикалық жөндеулер жүргізілген.
