Мемлекет басшысы Қасым-Жомарт Тоқаев медицина қызметкерлеріне шабуыл жасағандарға жазаны күшейтуді тапсырды, - деп хабарлайды aqshamnews.kz тілшісі.
"Мемлекет басшысы медицина қызметкерлеріне шабуыл жасап, күш қолданып және қатыгездік танытқан әрекеттерге қатысты жазаны қатаңдату мақсатында ұлттық заңнамаға өзгерістер енгізу туралы Парламент депутаттарының, денсаулық сақтау саласы өкілдерінің және белсенді азаматтардың ұсынысын қолдайды", - делінген хабарламада.
Дәрігерлердің денсаулығына нұқсан келтіріп, өміріне қауіп төндіретін мұндай келеңсіздіктерге "Заң және тәртіп" қағидатына сәйкес құқықтық тұрғыда батыл түрде тосқауыл қойылуы керек.
Президент Үкіметке тиісті заңнамалық түзетулер әзірлеуді тапсырды. Бұл бастама Парламентте азаматтық қоғам өкілдерімен бірге талқыланады.
Еске салайық, бұған дейін Қарағандыда науқас жеке емхананың дәрігеріне шабуыл жасаған болатын. Оқиға дәл медициналық мекеме ғимаратында болған.
Қостанайда облыстық ауруханада хирург аяусыз соққыға жығылды.
Дәрігерге шабуыл жасаған күдікті екі айға қамауға алынды. Денеге ауыр зақым келтіргені үшін ол 3 жылдан 8 жылға дейін бас бостандығынан айырылуы мүмкін.