Қазақстандық теннисші Заңғар Нұрланұлы Australian Open-2026 турниріндегі сәтті өнер көрсетуінің нәтижесінде ITF Juniors әлемдік рейтингіндегі орнын жақсартты, - деп хабарлайды Aqshamnews.kz.
17 жастағы спортшы жасөспірімдер арасында Аустралияның ашық біріншілігінің жекелей сынында жартылай финалына дейін жеткен Қазақстан тарихындағы алғашқы теннисші атанды. Осы жетістігінің арқасында жаңартылған рейтингте ол 12-орыннан 9-орынға көтерілді.
Өткен жылдың күзінде қазақстандық теннисші US Open Juniors турнирінің де жартылай финалына дейін жеткен болатын. Бұған дейін еліміздің бірде-бір ойыншысы жасөспірімдер арасында «Үлкен дулыға» сериясындағы турнирлерде екі мәрте жартылай финалға шықпаған.
Айта кетейік, қазіргі таңда WTA, ATP және ITF Juniors әлемдік рейтингтерінің алғашқы ондығында бір мезгілде Қазақстанның үш өкілі бар. Australian Open жеңімпазы Елена Рыбакина WTA рейтингінде үшінші орында тұрса, Александр Бублик ATP рейтингінде оныншы сатыда орналасқан. Ал Заңғар Нұрланұлы ITF Juniors рейтингінде тоғызыншы орынды иеленіп отыр. Сондай-ақ Australian Open-2026 турнирінің жұптық сындағы финалисі Анна Данилина әлемдік рейтингтің 11-орнында тұр.