Алматыдағы Балуан Шолақ атындағы спорт кешені алаңында «Жасанды интеллект жылы» аясында өткен «Jas Stars» ауқымды жастар концерті 5000-нан астам көрерменнің басын қосты, – деп хабарлайды aqshamnews.kz тілшісі.
Кеш тек музыкалық шоу емес, сонымен қатар, алдағы 15 наурызда өтетін республикалық референдумды қолдауға бағытталған белсенді азаматтық алаңға айналды.
Іс-шараға қала жастары, қоғамдық ұйым өкілдері, белсенділер мен еріктілер қатысты. Сахна төрінде сөз сөйлеген спикерлер жаңа Конституция жобасының маңызына тоқталып, референдумға қатысу – әр азаматтың ел болашағына қосқан үлесі екенін атап өтті. Олар жастарды ел тағдырына бейжай қарамай, өз таңдауын жасауға шақырды.
Кештің басты ерекшелігі – заманауи технология мен өнердің үйлесімі. Ортаға шығып, жастармен көңіл көтерген робо-DJ Темірбек пен алматылық барыс Әділет кештің жұлдыздарына айналды. Темірге жан біткендей әсер қалдырып, көрермендерді жаңа дәуірдің ырғағымен тербетті.
Кештің көркін қыздырған қазақстандық эстраданың жарық жұлдыздары да сахнаны гүлдендіре түсті. Жастар үшін Muzart Life, Dieta kz, Луина, Мирас Жүгінісов, Dj Ахметов + Dj робот, Арқайым, Алатау серілері, Нұрсұлтан Нұрбердиев, Alpha, Moonlight өнер көрсетіп жатыр.
Ұйымдастырушылардың айтуынша, мұндай ашық әрі креатив форматтағы шаралар жастардың саяси сауаттылығын арттырып, қоғамдық үдерістерге белсенді араласуына серпін береді. Концерт аяғында жүргізушілер алматылықтарды 15 наурыз күні өтетін республикалық референдумға қатысып, ел болашағы үшін саналы таңдау жасауға шақырды.