Қазақстанда Мемлекет басшысының тапсырмасына сәйкес Үкімет қаулысымен «Таза Қазақстан» экологиялық мәдениетін дамытудың 2024–2029 жылдарға арналған тұжырымдамасы бекітілді. Бұл құжат халықтың экологиялық мәдениетін қалыптастыруға, табиғатты қорғауға деген жауапкершілікті арттыруға және қоғамды экологиялық мәселелерді шешуге белсенді тартуға бағытталған.
Экологиялық мәдениет және саясат департаментінің директоры Дәулет Есмағамбетовтің айтуынша, тұжырымдама шеңберінде көгалдандыру, абаттандыру, экологиялық конкурстар, эковолонтерлік шаралар және халықтың экологиялық білімін арттыруға бағытталған іс-шаралар жүзеге асырылуда. Өңірлерде арнайы іс-қимыл жоспарлары қабылданды.
Нәтижелер: бастаманың іске қосылғанынан бері мыңнан астам экологиялық акция өтті; биылдың өзінде 767 іс-шара ұйымдастырылып, оған 10,4 млн адам қатысты, соның ішінде 586 мың ерікті бар; жалпы 1,6 млн тоннадан астам қалдық жиналып, 859,6 мың гектар аумақ тазартылды; жыл сайын 3 млн ағаш отырғызу жоспарланғанымен, қазірдің өзінде 4,7 млн ағаш отырғызылды, қалғаны күзге жоспарланған.
Қазақстанда жыл сайын 4,5 млн тоннадан астам тұрмыстық қалдық түзіледі, былтыр олардың 25,8 пайызы қайта өңделген. Бұл көрсеткішті арттыру үшін 67 жоба мақұлданып, 346,6 млрд теңге қарастырылды.
Қалаларда экобокстар мен фандоматтар орнатылуда. Мысалы, Астана, Алматы, Ақтөбе және Өскеменде пластик пен алюминий жинайтын 100-ден астам фандомат жұмыс істеп тұр. Тамыз айының соңына дейін Астана мен Жезқазғанның 129 мектебінде қоқысты бөлек жинауға арналған 1000-нан астам экобокс қойылады.
Бұл шаралар полигондарға жіберілетін қалдық көлемін азайтып, елде экологиялық мәдениетті нығайтуға ықпал етпек.