Бизнесті артық жүктемесіз қалай жаңғыртуға болады, экологиялық шешімдерге көшу қанша тұрады және кәсіпкерлерге қандай қолдау шаралары қолжетімді? Осы мәселелер Алматының Наурызбай ауданы әкімдігінде өткен кәсіпкерлермен кездесудің негізгі тақырыбына айналды, – деп хабарлайды aqshamnews.kz тілшісі.
Талқылауға аудан әкімдігі, Алматы қаласының Экология және қоршаған орта басқармасы, «Eco Almaty» ЖШС, салалық қауымдастықтар мен кәсіпкерлер өкілдері қатысты.
Кездесудің басты тақырыбы - 2025 жылы 30 желтоқсанда Алматы мәслихаты бекіткен атмосфералық ауаны қорғау ережелері болды. Бизнес өкілдеріне қолданыстағы экологиялық талаптар, нысандарды кезең-кезеңімен жаңғырту және қаладағы зиянды шығарындыларды азайтуға көмектесетін шаралар туралы айтылды.
Әсіресе, экологиялық таза отын түрлеріне көшу, шығарындыларды тазарту жүйелерін орнату және бизнесті қолдау мүмкіндіктеріне ерекше назар аударылды. Ашық диалог барысында кәсіпкерлер туындаған қиындықтарды тікелей талқылап, мәселесін айтып, өздерін толғандырған сұрақтарды қойды.
«Eco Almaty» ЖШС өкілдерінің айтуынша, мұндай кездесулер тұрақты түрде өткізіліп, шағын және орта бизнестің түрлі салаларын қамтиды.
Еске салайық, атмосфералық ауаны қорғау ережелері Алматыдағы экологиялық жағдайды жақсартуға бағытталған. Құжатта қаланың газ тартылған аудандарында қатты және сұйық отынды пайдаланудан бас тарту, шығарындыларды тазарту жүйелерін міндетті түрде орнату және ауаның ластануын төмендетуге бағытталған өзге де шаралар қарастырылған.
2025 жылы 27 қарашадан бері шағын және орта бизнестің 2 100-ден астам нысаны тексерілді. Олардың қатарында техникалық қызмет көрсету бекеттері, қоғамдық тамақтану орындары және монша кешендері бар. Тексеру барысында қатты отын пайдаланатын 760 нысан анықталып, шамамен 110 кәсіпорын шығарындыларды тазарту жүйелерін орнатқан.