Алматыда Желтоқсан оқиғасының қатысушылары студенттермен кездесулер өткізуде. Бұл жүздесу кештерінің мақсаты – жастардың патриоттық сезімдерін нығайту, ұрпақтар сабақтастығын жалғастыру. Кездесулерге мегаполистегі 20-ға жуық желтоқсан ұйымының өкілдері қатысуда.
Олардың қатарында «Желтоқсан ақиқаты», «Патриот-1986», «Ғасыр тарихы. 1986 ж. Желтоқсан», «Желтоқсан жұлдыздары», «Желтоқсан зейнеткерлері», Желтоқсан 1986. Тәуелсіздік», «Өршіл рух» секілді ұйымдардағы желтоқсан оқиғасының қатысушылары бар.
Бұған дейінгі кездесулер Алматы мемлекеттік автомобиль құрылысы колледжі, Алматы мемлекеттік туризм және қонақжайлылық индустриясы колледжі, Көлік және коммуникация колледжі, Алматы мемлекеттік бизнес колледжі және Инновациялық колледждер студенттері мен оқытушылары арасында өтті. Желтоқсан оқиғасының қаһармандары жастармен кездесулерде еліміздің тәуелсіздігінің бастауы болған тарихи оқиға туралы естеліктерімен бөлісті.
«Біз жасаған кесте бойынша қаладағы әр ұйымның өкілдерінен құралған 7-8 желтоқсаншы оқу орындарына барып, жастармен кездеседі. Олар жастарға Тәуелсіздік бастауы болған Желтоқсан оқиғасынан сыр шертеді. Желтоқсаншы аға-апаларының рухқа толы әңгімелерінен жастар өздеріне от алып, елжандылық сезімдері еселенуде», – дейді кездесулерді Алматы қаласы Қоғамдық даму басқармасының қолдауымен «Патриоттық рух – басты құндылық» жобасы аясында ұйымдастырушы халықаралық «Жанашыр» қоғамдық қорының басшысы Жаңыл Әпетова.
Кездесу барысында студенттер мен оқытушылар Желтоқсан қаһармандарына сұрақтар қойып, ашық диалог жүргізді.
Сонымен қатар, жастар желтоқсандық аға-апаларына патриоттық рухтағы концерттік бағдарламалар мен арнайы қойылымдар ұйымдастырып қарсы алуда.
Расында, жастарға серпін берер мүндай кездесулер қажет-ақ. Қазақстанның ең басты құндылығы саналатын Тәуелсіздікке жол ашқан рухы асқақ, тамыры терең Желтоқсан тарихымыздың бөлінбес бөлшегі десек, оның маңызын ұрпақтан ұрпаққа жеткізу бәрімізге бәрімізге парыз.