Алматыда ақын, сазгер, Қазақ авторлар қоғамының мүшесі Салтанат Сұлтанованың шығармашылығына арналған «Тәуелсіздік -тұғырым» атты әдеби-сазды кеш өтті. Кешті Салтанат Сұлтанова өзінің «Тәуелсіздік тұғырым» атты жырымен ашып, «Туған жерге», «Жердің де жүрегі бар», «Домбыра» деп аталатын өлеңін оқыды.
Өлең өлкесінде өзіндік оқырманы бар сан қырлы талант иесінің осынау жылдар ішінде бағындырған биіктері көңіл көншітерлік. Шығармашылығы, алдағы жоспарлары туралы баяндап, көрермендердің сауалын жауапсыз қалдырмады. Келесі кезекте ақынның «Ару қала- Астана», «Батырдың ұраны», «Туған өлкем», «Жасылдар маршы» атты әндері орындалып, кештің көркін кіргізді.
Сондай-ақ, шараға еңбек ардагері Дәрия Сарқытбаева, танымал диктор, Қазақ радиосының ардагері Бүркіт Бекмағанбетов, Әйтей ауылдық округі «Аналар қоғамынан» Бақытгүл Құланшиева, Үмітханым Сейдіғалиева, Мәдениет қайраткері, әнші Нұржамал Әшімхан қатысып, тәуелсіздік жолында ерлік көрсеткен ұлт қайраткерлерін еске алды.
