Таяу жылдары Сауд Арабиясында су үстінде жүзіп жүрген тасбақаға ұқсас үлкен шаһар, яғни яхта пайда болатын көрінеді.
Ол қаланың аты да белгілі – «Пангеос» (Pangeos) деп аталмақ. Мұхит үстінде үстемдік құратын тасбақа-қала бақандай 8 млрд долларға тұрғызылмақ. Оған 60 000 адамға дейін сыйып кетеді. Ішінде адам жанына керектінің бәрі табылмақ. Тамақ та ішесіз, сүйіктіңізбен отырып кофе де ұрттайсыз, киім-кешек дүкендерін аралайсыз, кітапханаға, кинотеатрға да барасыз, бақта серуендейсіз дегендей.
«Пангеос» құрылысы аяқталған күні ол жаһандағы жүзгіш бірегей, жалғыз нысан болмақ. Оның ұзындығы 550 метр, ал ені тасбақаның қанатын есепке алғанда 610 метр болмақ. Ерекше нысанды тұрғызуды қолға алған мамандар сегіз жылда қолданысқа береміз деп сенімді айтып отыр.
Әрқайсысының күші 16 800 л.с. болатын 9 HTS қозғалтқышымен жұмыс істейтін «Пангеос» қуатты мұхит толқындарынан және күн көзін қабылдайтын панельдермен жабылған шатырдан алатын көрінеді. Иә, бүгінде адам баласының қолынан келмейтін нәрсе қалмай бара жатқан сияқты.
Нұр ЖАМАЛ