Назарбаевтың бұрынғы құдасы Асқар Ақаев қалаған мәртебесіне қол жеткізе алмады, деп хабарлайды aqshamnews.kz
Жогорку Кенеш Асқар Ақаевқа Қырғызстанның экс-президенті мәртебесін қайтарудан бас тартты. Kloop басылымының мәліметінше, бұл шешім үшін 71 депутат дауыс беріп, екеуі қарсы шыққан.
«Бұл өте маңызды мәселе болды. Біз бәріміз тәуелсіздік жылдарында еліміздің қандай қиындықтарға тап болғанын көрдік. Жақсылығынан жаманшылығы көбірек болды. Мұнда бірінші президент Асқар Ақаевтың кінәсі бар. Оның ішінде Аксы оқиғалары да бар. Аксы сайлаушылары бұл мәселені терең алаңдаушылықпен бақылап отырды. Парламент дұрыс шешім қабылдады деп ойлаймын. Тарих пен халық өз бағасын береді», — деді Қырғыз Республикасы парламентінің спикері Нурланбек Шакиев.
Асқар Ақаев 1990 жылдан 2005 жылға дейін Қырғызстанды басқарған. Ол халық наразылығынан кейін, яғни «қызғалдақ төңкерісі» деп аталатын оқиғадан кейін елден қашып кетті.
Нұрсұлтан Назарбаевтың кіші қызы Ақаевтың үлкен ұлына тұрмысқа шыққан еді. Олар некеде үш жылға жетпей өмір сүрді (1998–2001 жж.).