Тараздағы мектептердің бірінде үзіліс кезінде 10-сынып оқушысы соққыға жығылып, ауыр жарақат алды, – деп хабарлайды aqshamnews.kz тілшісі КТК-ға сілтеме жасап.
Оқиға гимназия ғимаратында сабақ арасындағы үзілісте болған. Алдын ала мәлімет бойынша, 15 жастағы жасөспірімді өзінен кіші сынып оқушылары алдап ұлдарға арналған киім ауыстыратын бөлмеге кіргізген. Сол жерде жанжал туындап, соңы төбелеске ұласқан.
Бақылау камерасындағы жазбалардан оқиға бірден күш қолдануға ұласқаны байқалады. Жәбірленушінің досы араша түспек болғанымен, оны ұстап қалған. Осы сәтте оқушының басынан бірнеше рет соққы алғаны анықталған.
Ауыр соққы салдарынан жасөспірім көзінен айрылып, шұғыл түрде ота жасалған. Қазір оның жағдайы ауыр, есінде үзік-үзік ғана деректер сақталған. Туыстарының айтуынша, дәрігерлер көзді сақтап қалу үшін күрделі операция жасаған, ал алдағы 10 күн шешуші кезең болып отыр. Сондай-ақ бала ми шайқалуын алып, контузия диагнозы қойылған.
Жәбірленуші шабуыл кезінде күдіктілердің қолында темірге ұқсас зат болғанын айтқан.
Бұл дерек бойынша қылмыстық іс қозғалды. Жамбыл облысы полиция департаментінің мәліметінше, іс “Денсаулыққа қасақана ауыр зиян келтіру” бабы бойынша тергеліп жатыр. Күдікті ұсталып, уақытша ұстау изоляторына қамалған.
Оқиғаның барлық мән-жайы анықталып жатыр.