Ауыл шаруашылығы министрі Ербол Қарашөкеев ішкі нарықты қантпен қамтамасыз ету жайлы айтты.
Республика бойынша тамыз айының соңында қанттың жалпы қоры 118 мың тоннаны құрайды, деп хабарлайды Almaty-akshamy.kz
Министрдің айтуынша, шілде айының басында республикадағы қант қоры 28 мың тоннаны құраған. Айдың соңына дейін 37 мың тонна қант өндіріледі деп болжанып отыр.
«Квота аясында импорт көлемі 33,3 мың тоннаны құрайды. Осылайша ішкі қажеттілік 69,8 мың тонна болса, қанттың жалпы қоры 98,1 мың тонна болады деп күтілуде. Шілде айында қант зауыттарындағы қант құрағынан қант өндіру көлемін ескерсек, қант көлемі жеткілікті. Өз-өзімізді қамтамасыз ете аламыз», - деді Қарашөкеев.
Ол тамыз айындағы қантқа болжамды қажеттілік 69,8 мың тонна екенін атап өтті.
«Бұл - тұтынудың ең жоғарғы көлемі. Тамыздың басында республика бойынша қант қоры 35 мың тонна болжанып отыр. 42,2 мың тонна қант импортталады деп күтілуде. Әкімдіктер қорын ескерсек, республика бойынша қанттың жалпы қоры тамыз айының аяғына дейін 118 мың тоннаны құрайды деп жоспарлануда. Сол себепті осы шілде-тамыз айларында өзімізді қамтамасыз ету үшін қант қоры жеткілікті», - деді министр.
Қарашөкеевтің айтуынша, республика бойынша қант балансы оң сальдоны көрсеткен. Биыл қаңтар айынан бастап отандық қант зауыттары 120 мың тонна құрақ шикізатынан қант өндірді. Бұл өткен жылдың ұқсас кезеңімен слыстырғанда 19 пайызға артық.