2019 жылдан бері Түркия Президенті Әкімшілігінің Адам ресурстары басқармасының үйлестіруімен ұйымдастырылып келе жатқан TalentforBIZ карьералық іс-шаралары әлемнің 10 елінде 15 рет өтіп, жұмыс берушілер мен жас мамандарды біріктіріп келеді.
Биылғы жылы бұл шара 2 қарашада Алматыда InterContinental Almaty қонақүйінде өтеді. Іс-шара таңғы 09:00-ден кешкі 17:00-ге дейін жалғасады, деп хабарлайды aqshamnews.kz
Алғашқы рет ұйымдастырылған сәттен бастап, шара мыңдаған жасқа жұмысқа орналасуға мүмкіндік берді. Мақсаты – Қазақстан жастарын ғаламдық түрік компанияларымен таныстырып, екі ел студенттері мен түлектеріне жұмысқа орналасу, тағылымдамадан өту және білім алу мүмкіндіктерін кеңейту.
Алматыдағы TalentforBIZ аясында әртүрлі салаларда қызмет ететін жетекші түрік компаниялары, соның ішінде Turkish Airlines, Түрік аэроғарыш өнеркәсібі, Aselsan, Havelsan, Halk Bankası, Türk Telekom, сондай-ақ Қазақстанда қызмет көрсетіп жүрген Abdi İbrahim, Esan Eczacıbaşı, Ziraat Bankası және Pro Yapı компаниялары қатысады. Шара барысында жас таланттар компаниялардың кадрлық қызмет басшыларымен тікелей сөйлесу мүмкіндігіне ие болады. Күні бойы компания басшылары мен адам ресурстары мамандары презентациялар, пікір алмасулар, ақпараттық сессиялар мен сұхбаттар өткізеді.
АДАМ РЕСУРСТАРЫ САЛАСЫНДАҒЫ ЫНТЫМАҚТАСТЫҚ НЫҒАЯДЫ
Түркияның адам ресурстары саласындағы тәжірибесі мен жетістіктері Қазақстанға беріліп, екі ел арасындағы өзара іс-қимыл күшейе түсуде. Бұл үдеріс жастарға жұмысқа орналасу мүмкіндіктерін ұсына отырып, Қазақстандағы жұмыс берушілерге білікті кадрлармен қамтамасыз етуді жеңілдетеді. Сонымен қатар, екі ел арасындағы білім мен тәжірибе алмасу жас мамандардың мансаптық дамуына елеулі үлес қосады. Адам ресурстары саласындағы халықаралық ынтымақтастықты нығайту мақсатында бұл іс-шара Қазақстаннан кейін де өзге халықаралық орталықтарда жалғасын табады.
БАРЛЫҚ ҮДЕРІСТЕР YETENEK KAPISI ЦИФРЛЫҚ КАРЬЕРАЛЫҚ ПЛАТФОРМАСЫ АРҚЫЛЫ ЖҮЗЕГЕ АСАДЫ
TalentforBIZ іс-шараларына тіркелу Түркияның Yetenek Kapısı цифрлық карьералық платформасы арқылы жүзеге асырылады. Жастар іс-шараға тіркеліп қана қоймай, жұмысқа қабылдау және тағылымдамаға өту үшін сұхбаттарға өтінім бере алады. Қатысушылар өздерінің дағдыларын жұмыс берушілерге барынша жақсы көрсету үшін Yetenek Kapısı платформасындағы профилдерін толықтырып, үнемі жаңартып отырулары ұсынылады.
Іс-шара туралы толық ақпаратты talentforbiz.org ресми сайтынан және @talentforbiz әлеуметтік желілерінен табуға болады.
