Жетісу облысында прокуратура интернет-алаяқтардың құрбаны болған азаматқа ұрланған қаражатын қайтарып берді, деп хабарлайды Аqshamnews.kz тілшісі.
Талдықорған қаласының прокуратурасы сотқа дейінгі тергеп-тексеру аясында қаржылық активтерді қорғауға арналған цифрлық құралдарды пайдаланып, жәбірленушінің ақшасын толық көлемде өндіріп алған. Қайтарылған сома - 850 мың теңге.
Прокуратура мәліметінше, ҚР Қылмыстық кодексінің 190-бабы 3-бөлігі бойынша жүргізіліп жатқан іс барысында прокурорлар ҚР Ұлттық банкінің "Антифрод-орталығы" платформасында инцидент құруды бастамашылық еткен. Соның нәтижесінде ұрланған қаражат түскен банктік шоттар жедел анықталып, бұғатталған.
"Төлемдер және төлем жүйелері туралы" заң талаптарына сәйкес қабылданған шаралар арқылы күдіктілердің шоттарындағы 850 000 теңге алынып, заңды иесіне қайтарылды.
Прокуратура киберқылмыспен күресте уақыттың аса маңызды екенін атап өтті: құқық қорғау органдарына дер кезінде жүгіну және транзакциялар жөніндегі деректерді ұсыну қаражатты бұғаттап, қайтару мүмкіндігін едәуір арттырады.
Ведомство интернет-алаяқтыққа қарсы іс-қимыл мен азаматтардың құқықтарын қорғау прокуратура органдарының қадағалауындағы басым бағыт болып қала беретінін қосты.
