Талдықорғанда полиция қызметкерлері есірткі сақтау және өткізу күдігімен 62 жастағы әйелді ұстады. Тергеу барысында оның үйі мен қорасынан ірі көлемде есірткіге ұқсас зат табылған, деп хабарлайды Aqshamnews.kz тілшісі.
Polisia.kz мәліметінше, күдіктіге жедел уәкілдер бақылаудағы сатып алу шарасы арқылы шыққан. Осылайша одан аз мөлшерде гашиш сатып алынған.
Кейін тәртіп сақшылары күдіктінің үйіне тінту жүргізіп, өсімдік тектес зат салынған алты пакетті тәркілеген. Алайда негізгі айғақ қора-жайдан табылған. Онда скотчпен оралған ірі қара пакет жатқан.
Полицияның алдын ала дерегіне сәйкес, пакет ішінен жалпы салмағы 5 келіден асатын гашиш табылған.
Қазіргі кезде бұл факті бойынша сотқа дейінгі тергеу жүргізіліп жатыр. Оқиғаның барлық мән-жайы анықталуда.
Сот шешімімен күдіктіге денсаулық жағдайына байланысты үйқамақ түріндегі бұлтартпау шарасы таңдалған.