Бұл норма жаңа Салық кодексі аясында күшіне енетін болады, деп хабарлайды aqshamnews.kz
Мемлекеттік кірістер комитетінің арнайы салық режимдерін әкімшілендіру басқармасының басшысы Ерқанат Шынбергеннің сөзінше, бұл тікелей қосымшалар мен интернет-платформалар арқылы жұмыс істейтін таксистер мен курьерлерге қатысты. Олар – Yandex, InDrive, Glovo, Wolt және басқа сервистер.
Дәл осы платформалардың операторлары жұмыс істейтін адамдар үшін әлеуметтік төлемдерді ұстап қалып, өзі аударады. Бұл норма 2024 жылдың 1 қыркүйегінен бастап күшіне енген және жаңа Салық кодексінде де сақталмақ. Ең басты айырмашылық, аталған санаттар үшін ЖК мәртебесі алынып тасталады.
– Қазір арнайы салық режимін қолданатындар – жеке кәсіпкерлер. Ал келесі жылдан бастап олар есептен алынып, жеке тұлға ретінде қарастырылады, – деді Е.Шынберген.
Тағы бір өзгеріс бар. Ол төлем құрылымына қатысты. Яғни, бірыңғай мөлшерлеме бұрынғыдай 4 пайыз болып қалады, бірақ оның ішінен жеке табыс салығы алынып тасталады. Оның орнына міндетті зейнетақы жарналары енгізіледі. Бұл жарналарды да платформаның операторы ұстап қалады.
– Жаңа Салық кодексінде де солай, әлеуметтік төлемдердің 4 пайызы, мысалы таксистер үшін платформа арқылы ұсталады. Ай қорытындысы бойынша оператор оларды тиісті қорларға аударады. Қазір бұл жүйені Қазақстан бойынша шамамен 118 мың адам пайдаланып отыр, – деп нақтылай түсті басқарма басшысы.
Жалпылама алғанды, ресми түрде салық жүктемесі өзгермейді, мөлшерлеме бұрынғыдай 4 пайыз болып қалады. Сондықтан, қағаз жүзінде жолақы мен жеткізу құны өзгермеуі тиіс.