Қаржы мониторинг агенттігі Алматы облысында бірнеше желісі бар жекеменшік стоматологияның МӘМС аясындағы қызметтер бойынша «Damumed» жүйесіне жалған мәлімет енгізіп, ірі көлемде қаржы жымқырғанын анықтады, – деп хабарлайды aqshamnews.kz тілшісі.
Залал сомасы – 66 млн теңге.
ҚМА мәліметінше, жеке стоматологиялық клиникалардың директоры Әлеуметтік медициналық сақтандыру қорымен жалпы құны 450 млн теңгеден асатын медициналық қызметтерді сатып алу туралы келісімшарттар жасаған. Құжат бойынша клиникалар азаматтарға міндетті әлеуметтік медициналық сақтандыру жүйесі аясында шұғыл және жоспарлы стоматологиялық көмек көрсетуге тиіс болған.
Алайда тергеу дерегіне сүйенсек, күдікті «Damumed» ақпараттық жүйесіне ортодонтиялық қызмет көрсетілді деген жалған ақпарат енгізуді ұйымдастырған. Нақтысында бұл қызметтер пациенттерге ұсынылмаған.
Заңсыз әрекеттерін бүркемелеу үшін күдікті дәрігерлердің есептік жазбаларын және бұрын клиникаға жүгінген кәмелетке толмаған пациенттердің жеке деректерін рұқсатсыз пайдаланған. Соның нәтижесінде 4 597 адамға «қызмет көрсетілді» деген жалған жазба тіркелген.
Сот күдіктінің банк шоттарындағы 23 млн теңгесіне және құны 29 млн теңге болатын стоматологиялық жабдықтарға тыйым салды. Тергеу барысында 11 млн теңге өтелген. Күдіктіге қатысты үйқамақ түріндегі бұлтартпау шарасы таңдалды.
