Таеквондодан Қазақстан Чемпионатының алғашқы жеңімпаздары марапатталды, – деп хабарлайды aqshamnews.kz тілшісі.
Жасөспірімдер арасында таеквондодан Шығыс Қазақстанда жалауын көтерген Қазақстан Республикасының чемпионатының алғашқы үздік спортшылары салтанатты түрде марапатталды. Елдің әр өңірінен келген жас спортшылар жоғары дайындық деңгейін көрсетіп, тартысты белдесулер өткізуде.
Жарыс 2012-2014 жылғы жасөспірімдер арасында 20 салмақ бойынша ұлдар және қыздар тобы арасында өтуде. Қазақстанның жиырма аймағынан жиналған 852 жас таеквондошы бес күн бойы бақ сынайды. Бүгін алғашқы болып жасөспірім қыздар арасындағы 33 келі салмақ дәрежесінің жүлдегерлері марапатталды. Құттықтау рәсіміне Шығыс Қазақстан облысының әкімі Нұрымбет Сақтағанов қатысты.
Аталған салмақта қола жүлдені Қызылорда облысының өкілі Әсел Саин мен Маңғыстау облысынан Раяна Жақсыгелді иеленді. Күміс жүлде Павлодар облысының спортшысы Валерия Капляға бұйырса, алтын медальді Атырау облысынан Айару Орынғали жеңіп алды.
Одан кейін жасөспірім ұлдар арасындағы 37 келі салмақ дәрежесінің жеңімпаздары марапатталды. Қола жүлдеге Алматы қаласының спортшылары Али Павликов пен Абдуллин Сатыбалды ие болды. Шымкент қаласының өкілі Қалдарбек Нұрдаулет күміс жүлдегер атанса, Жамбыл облысынан Ислам Ибрагим чемпион атанды.
Марапаттау рәсімі жасөспірім қыздар арасындағы 55 келі салмақ дәрежесі бойынша жалғасты. Бұл салмақта Маңғыстау облысының спортшысы Аружан Байыш пен Алматы қаласының өкілі София Уаисова қола жүлдеге ие болды. Ұлытау облысынан Томирис Сыздықова күміс жүлде алса, Астана қаласының спортшысы София Зиятдинова алтын медаль жеңіп алды.
Кеш соңында жасөспірім ұлдар арасындағы +65 келі салмақ дәрежесінің жүлдегерлері де марапатталды. Бұл салмақта қола жүлдені Қызылорда облысынан Елқожа Марат пен Астана қаласының спортшысы Данис Нұрымбетов иеленді. Ал финалда Алматы қаласының таеквондошылары бақ сынап, Мадияр Мейірханов күміс жүлдегер атанса, Искандер Даутов чемпион атанды.
– Соңғы рет 2019 жылы жастар арасында Шығыста өткізген болатынбыз. Енді міне, кадеттер арасында жарыс өтіп жатыр. Келесі жылы осы жылғы балалар арасында Әлем чемпионаты өтеді. Бұл сол додаға дайындық ретінде іріктеу. Күн сайын жарыс төрт салмақ дәрежесі бойынша өтуде. 15 мамырда қорытынды жарыстар өтеді, – деді ШҚО бойынша таеквондо федерациясының президенті Мерхат Болатханұлы.
Жарыс соңында ұйымдастырушылар бүгінгі жүлдегерлер мен қатысушыларды құттықтап, спортшылар естелік суретке түсті. Чемпионат жас спортшылардың шеберлігін шыңдап, еліміздегі таеквондо спортының қарқынды дамып келе жатқанын тағы бір мәрте дәлелдеді.